مينا فريد : الفيلم القبطي "نسر البرية" ..أنا كمينا انبهرت - e3lam.org

0 مشاركات شارك علي الفسيبوك شارك علي تويتر شارك علي جوجل

لايام كتير كان وسط الشباب المسيحي بيتكلم عن فيلم نسر البريه ..العرض الاول له كان في 2014 .. الفيلم انتاج دير السريان و بيتوزع في المكتبات المسيحيه بصوره مكثفه و ناس كتير بتشكر فيه.. عديت البوستات دي كلها عادي جدا .. ذكرياتي مع الافلام المسيحيه اللي كلها بتحكي عن سيره قديس من القديسين.. لا تتعدي ذكريات طفوله و انتهت مع مراحل المراهقه … يمكن الممثلين المسيحيين في مصر كلهم اشتغلوا في افلام مسيحيه .. اشهرهم طبعا جورج سيدهم و هاني رمزي و يوسف داوود و مؤخرا ماجد الكدواني .. بس دايما الافلام اللي بتحكي سيره القديسين كانت بتبقي ساذجه جدا بالنسبه لي .. انتاج ضعيف و اداء تقليدي و اخراج اقل ما يقال عنه انه ضعيف و مخرج اوحد اسمه ماجد توفيق.. لما كبرت شويه و شفتهم .. كنت بحسها افلام كوميديه و ماكنتش بتوصّل اي حاجه خالص.. في نفس الوقت كان المسرح الكنسي مزدهر و بشده و طلّع مواهب بصوره كبيره و فجّر قدرات شباب مصريين موهوبين .. و اتحرر من قيود الانتاج الضعيفه و قيود سير القديسين و بدا يتكلم في الحياه و المجتمع و الناس .. صحيح الشطحات المسرحيه القويه كانت بتتقابل بتضييق من القيادات الكنسيه بس كانت متنفس .. طلع منها شباب كتير جدا لخدمه مش بس الكنيسه ولا المجتمع .. لا كمان وصلت لخدمه العالم … مثال لده شاب خريج فنون تطبيقيه اسمه جون ميلاد .. موهوب جدا.. وصل انه اتكرم من اوباما نفسه لجهوده في مكافحه الفقر و القهر و الظلم و التحرش بفرقه بدات بهواه اسمها و لسه و وصلت للعالم كله .. جون بدا بمسرح لا يتعدي مساحته 25 متر مسطح في الفيوم كان لي شرف اني وقفت مثلت في مرحله جامعه في نصوص من كتابته و اخراجه ..ووصل للعالم كله بفنه و موهبته .. و لما رجع مفيش قناه في مصر ما استضافتوش… فيه زي جون مواهب كتير شابه .. يمكن معندهاش مغامره جون .. بس محتاجه عين و زقه و فرصه تطلع و تنوّر سما الفن المصريه.. و تخرج من عبايه الكنيسه للعالم .. و زي ما بتقدم رساله جوه الكنيسه فعلا تقدر تقدمها بره..

ده فيديو لتكريم جون من اوباما

نرجع للفيلم.. قناه الكنيسه القبطيه الارثوذكسيه قبل عرض الفيلم علي شاشتها باسبوع عملت تنويهات كتير .. برضه ما اهتمتش.. بالصدفه امبارح جه قدامي و شفته .. و اتفاجئت بالمستوي… في نقط صغيره هحط انتمائي الديني علي جنب و ابص عليه كاي فيلم…

اولا : اول ما شدني في الفيلم انه فيه احمد حلاوه الممثل الكبير .. و ممثلين مسلمين كتير تاني من الصفوف التانيه و التالته في السينما المصريه .. الفيلم نفسه بقي بطوله ممثل شاب اسمه فريد النقراشي .. يمكن الاسم مايكونش في بالك بس لو شفته هتعرفه ..

ثانيا : الفيلم بيحكي عن راهب اسمه فلتاؤس السرياني ..السرياني ده نسبه لانه كان واحد من رهبان دير السريان و ده بيبان في الفيلم و بيفسر اهتمام الدير نفسه بانتاج فيلم ديني عن واحد من رهبانه.

ثالثا : الموسيقي احترافيه و مؤثره .. و الاضاءه مختلفه .. حتي الجرافيكس قوي جدا .. مستوي التمثيل رائع و قوي و فيه شغل عالي جدا باين فيه .. انا انبهرت ..مش عشان الفيلم .. عشان وصلت الكنيسه القبطيه لافلام بالمستوي ده .. تقريبا نص افلام السينما المصريه مافيهاش الاهتمام بالتفاصيل دي

رابعا : السيناريو مترابط و المونتاج رائع .. و مفهوم حتي لحظات الفلاش باك احترافيه و المزج بين المشاهد الابيض و الاسود و الالوان معموله بصوره مريحه للعين .. بالنسبه للقصه.. و الاحداث مش هقيمها لان دي هعتبرها شان ديني و طبيعي مش هيقبلها غير المسيحيين و مش بس المسيحيين لا و طائفه الارثوذكس تحديدا ..

خامسا : الاخراج كان لجوزيف نبيل .. اخراج رائع لمخرج انا شايفه مثلا اقوي من نص مخرجين افلام السبكي

سادسا : ظهور البابا شنوده في الفيلم كان مفاجاه مبهره .. ازاي المكياج كان رائع كده .. و ازاي جابوا حد يقلد الصوت كده .. صحيح كان مكياج الوجه رائع بس فات عليهم مكياج الايد و هي بتسلم الكاميرا بينت ان دي ايد شاب…

سابعا : الترانيم و الموسيقي .. صوت الترانيم بصوت قسيس هو الاشهر حاليا اسمه موسي هو موهوب و ربنا اداله صوت جميل .. زوّد قيمه الفيلم…

في المجمل الفيلم اقوي فيلم ديني مسيحي اتعمل … و ده مافرحنيش علي اد ما حط اكتر من سؤال …

اولهم .. الكنيسه المصريه .. مطالبه تطلع بره عبايه القديسين شويه. مع افلام السير الدينيه تعمل فيلم يشوفوه مسيحيين و مسلمين و ملحدين حتي .. طالما فيه امكانيات ماديه و بشريه .. بدل ما ننادي بالمواطنه و بس .. ندخل فيها بجد بافكار كتير مجتمعيه و انسانيه..

و اخرهم .. البلد .. الحكومه .. وزير الثقافه .. انزلوا .. دول شباب مصري موهوب قبل ما يكون مسيحي موهوب .. بدل ما تقابل السبكي في مكتبك شوف الشباب دول .. خرجوهم بره اطار سير القديسين.. خلّوهم يخدموا مجتمع كامل . الكنايس المصريه فيها نشاط مسرح يفرح و هما نفسهم يخرجوا بره الاطار الديني.. صدقوني دول شباب زي الورد موهوب مستني فرصه .. ماتنسوهمش

واقعه اغتصاب متخيله علي قناه الشرق

اسباب “احتلال” نجوم ستار اكاديمي لتريند تويتر

علاء العطار: هكذا نحارب “داعش” في الاهرام العربي

فتوي اخوانيه : انتحر قبل القبض عليك

”النهار اليوم” تبث اول فيديو للعمليه الارهابيه بتونس

اول تعليق لاحمد موسي علي حبسه لعامين

خالد صلاح: لن اعتذر عن حوار “عز”

تامر امين: “عطيه” يدافع عن الشهداء في كباريه‎

نجلاء فتحي للقرموطي: وضعي المادي جيد ولا احتاج سوي الدعاء

 رقيه السادات : امتلك فيديو يدين مبارك في اغتيال السادات