صبري إسكندر: دخولي عالم سمسم كان فرصة من ربنا

تحدث الفنان صبري إسكندر، عن تفاصيل دخوله الوسط الفني من خلال مسلسل الأطفال الشهير عالم سمسم، بجانب الكشف عن سبب غيابه عن الساحة الفنية.

وقال صبري إسكندر، في لقائه مع الإعلامية إنجي هشام، في برنامج "المنسي" المذاع عبر شاشة قناة "هي": أنا في مراحل حياتي بعشق الفن، وكان ليا صديق بيكلمني بيقولي أنت فين، قالي أنزل في الحتة الفلانية بيعملوا تيست كاميرا لبرنامج حلو أوي وبيشكروا فيه، بالصدفة أن كان اليوم ده آخر يوم وآخر ساعة، والتعامل مع العروسة شيء خطير، في ناس تبص للعروس من الجنب، وحطوا لي عروستين وأنا تفاعلت معاهم ولما شافوا الشرايط دي كلها وشاوروا عليا، وكلموني علشان أكتب العقد وكان نصيبي.

وتابع: أنا عايز أشكر ربنا علشان إداني الفرصة دي، أنا طبيعتي الحب والبشاشة والمودة والنصح، و عالم سمسم إداني الفرصة في ده، ومكنتش متوقع نجاحه بالشكل ده، ومكنش صعب عليا ألاقي نفسي مع مجموعة العرايس، وكل الكواليس كانت محبة مع الكاست كله.

أما عن سبب غيابه عن الساحة الفنية، فعلق صبري إسكندر: أنا مختفتش بمزاجي، إنما بعد عالم سمسم أنا اشتغلت مسرح مع عمالقة الفن في مصر، واشتغلت مع الفنانة سميحة أيوب، والوقوف جنبها شرف كبير، ولما شافت دوري استدعت الصحفيين وقالت الفنان ده أعلموا له لقاء وحديث لدرجة أن كتبوني مع العمالقة الكبار.

وأضاف: أشتغلت في مسرحية كانت بتجمع عمالقة الفن كله، زي حسين فهمي، ويسرا، وعلاء ولي الدين، ووحيد سيف، ومحمد سعد، وعزت أبو عوف، وكان من إخراج أستاذ شريف عرفة، هو مبدع وبيدي كل واحد مساحته.