عاجل..نشأت الديهى يهاجم أحمد الطنطاوى: بلاش مزايدات سياسية

هاجم الإعلامي نشأت الديهي؛ النائب السابق أحمد طنطاوي على خلفية حواره مع هيئة الإذاعة البريطانية بي بي سي حول الحوار الوطني الذي دعا إليه الرئيس عبد الفتاح السيسي.

وقال الديهي خلال برنامج "بالورقة والقلم" المذاع على قناة "تن": "أحمد طنطاوي بيقول أن الحوار فرصة لإنقاذ مصر وليس لتبيض وجه النظام؛ هل عشان الدولة دعت لحوار وكلنا قبلنا الحوار أن حد يتشرط ويتطاول ويقول ما لا يقبل".

وأضاف: "انت يا احمد طنطاوي هتنقذ النظام؟ انت هتنقذ الدولة؟ أنت عندك إيه يابني؛ زي جمال عيد بيتكلم عن حقوق الانسان وبينتهك حقوق الانسان معايا أنا شخصيا؛ وكلما راجعت نفسي أمام هؤلاء أيقنت أنني على صواب".

وتابع: "انت بتقول إنك بتاع حقوق انسان؛ مش قادر تتحمل رأيي؛ طيب ما تقول رأيك؛ أنت بتتكلم أنك بطل من أبطال النضال الوطني؛ هي المشكلة بينك وبين الدولة ايه؟ عندك فلوس ومش عارف تثبت جبتها منين".

وأكمل: "أحمد طنطاوي بيقول لازم نعمل انتخابات مبكرة؛ هو كل هؤلاء ألم يكن بينكم رجل رشيد يستطيع أن يكون منصف وأن الدولة في 8 سنين قامت ببناء ايه وايه؛ وحولنا نسبة المعمور في مصر من 7% إلى 15%".

وأكمل: "كله بيتكلم على الديون دلوقت؛ تعالي قولي أعمل ايه؟ أجيب إيرادات منين أجيب موارد منين؛ الدولة قدرت تبني مشروعات بـ 8 تريليون جنيه منهم تريليون جنيه على مشروع حياة كريمة عشان ينقل واقع كفر الشيخ اللي أنت منها من واقع إلى واقع".