مي عمر عن رفض المشاركة في «نسل الأغراب»: شغلي مع محمد مضر ليّ وليه

قالت الفنانة مي عمر، إنها تعرضت للخيانة من صديقة لها منذ سنوات، موضحةً: «خيانة الأصدقاء أصعب بكتير من أي خيانة تانية.. الخيانة دي أثرت فيّ، عاتبتها ورجعنا اتكلمنا وسامحتها، بس معرفتش أبقى صاحبتها، غصب عني معرفتش نرجع لدرجة القرب اللي كنا فيها».\nأضافت «عمر»، خلال حوارها مع الإعلامية بسمة وهبة، مقدمة برنامج «العرافة» الذي يعرض عبر شاشة «المحور»: «لما بشتغل زيادة مش بيبقى عندي وقت زيادة لصحابي القريبين مني، وبحس إني مقصرة في حقهم، الموضوع بيبقى مرهق نفسيا، وخاصة لو بعمل شغل كتير بياخد مني وقت، بحس إني مش موجودة في البيت زي الأول، وبحس بتأنيب ضمير جامد».\nوحول اعتذارها عن المشاركة في مسلسل «نسل الأغراب» مع النجمين أحمد السقا وأمير كرارة وإخراج زوجها محمد سامي، قالت: «مش خيانة، بس بقيت أحس إن شغلي مع محمد مضر ليّ وله، لأني بحس إن مجهودي بيترمي في الأرض، لأن مهما عملت بيسيبوا أي حاجة أنا عملتها ومجهودي وتعبي وبيقولوا واسطة».\nوأضافت عمر، أنها طلبت من زوجها عدم المشاركة في المسلسل، لكنه رفض وأصر على مشاركتها: «قلت له أرجوك مش عاوزة أعمله، لأنه من أهم الأعمال في شهر رمضان، ومحمد مخرج متميز وبيطلع الممثلين بشكل مختلف، لكن لما بشتغل معاه مش باخد حقي بشكل كافي، وهو عندي ومش بيهمه كلام الناس ومش بيفرق معاه».