ماتخربيش على نفسك.. 10 نصائح للزوجات للهروب من مطب نهائى الأهلى والزمالك - اليوم السابع

وسط ترقب ملايين الرجال فى المحروسة تنطلق مباراة الأهلى والزمالك فى التاسعة مساء اليوم على استاد القاهرة الدولى فى نهائى دورى الأبطال الأفريقى، تلك المباراة التى وصفت إعلامياً بـ"نهائى القرن" لكونها اللقاء الأول بين الأحمر والأبيض فى نهائى البطولة الأفريقية العملاقة.\nونظراً لظروف فيروس كورونا سوف يجبر عدد كبير من مشجعى قطبى الكرة المصرية على مشاهدة نهائى القرن فى منازلهم بعيداً عن التجمعات الصاخبة المعروفة عن لقاءات القمة فى المقاهى والكافيهات والأندية والتجمعات الأسرية الكبيرة خوفاً من الفيروس اللعين.\nوإذ أن الزوجات باتت أمام قرار نهائى لا رجعة فيه بأن زوجها سوف يشاهد المباراة فى المنزل فهناك عشرة نصائح مبدئية تمثل الخلطة السحرية يجب أن تعلمها الزوجة بل وتنفذها حتى تتجنب "خناقة الماتش" المشهورة فى البيوت خاصة عند لقاء القمة بين الأهلى والزمالك وهو ما نلقى عليه الضوء فى التقرير التالى..\n1- تجنبيه نهائيا قبل الماتش\nياريت تتجنبى جوزك قبل الماتش لأن أعصابه بايظة وخايف إن فريقه يخسر وبالتالى هيكون عنده استعداد كبير للدخول فى أى خلاف معاكى أو مع الأولاد.\n2- ادعى ربنا يبعد عن بيتك النكد\nخسارة فريق زوجك يعنى أنه سيدخل فى دوامة من النكد، وبالتالى سوف تتأثر حياتك بهذه الحالة لذا ادعى ربنا يبعد النكد عن بيتك.\n\n3- اعمليله أكلة حلوة وزودى المشاريب\nأعملى الأكلة اللى بيحبها وخليكى جاهزة بالشاى والقهوة والنسكافيه طول الماتش، عشان هتقضى الساعتين فى المطبخ لحد المباراة ما تخلص.\n4- شجعى فريقه حتى لو غصب عنك\nلو بتشجعى فريق غير جوزك، يبقى الأفضل تخفى انتماءك ليلة نهائى القرن، والأفضل تشجعى فريقه خاصة لو الأمر مش فارق معاكى خالص، وشغلى أغنية صباح مناسبة ليكى وليه "الاتنين حلوين الاتنين طعمين محتارة اشيل مين ولا اشيل مين جوه عينيه".\n5- ابعدى عن الريموت أحسنلك\nمتحاوليش بأى طريقة تفكرى في مسلسل أو برنامج بعيد عن الكورة طول يوم الجمعة، لأن في الحالة دى هيعتبرك في عالم تانى ومش حاسة بالتوتر اللى هو عايش فيه قبل الماتش وبعده طبعاً، اقطعى علاقتك بالريموت اليوم ده.\n6- بلاش رغى كتير أثناء الماتش\nبلاش تتكلمى كتير أثناء المباراة عشان هيزعق أكيد، وحاولى تفهمى بعض مصطلحات الكرة التي بتكرر كتير عشان متسأليش أسئلة ملهاش لازمة.\n7- بطلى خناق مع العيال ورغى في التليفون\nبلاش تتخانقى مع العيال وقت الماتش وبلاش تمسكى التليفون تقضيها رغى جمبه أثناء الماتش.\n8- لو فريقه خسر ادخلى نامى\nهذه الطريقة الآمنة لتجنب خناقة أكيدة حال خسارة فريق زوجك، عليكى بالذهاب للسرير وبدء النوم مباشرة ، خاصة إذا لم تتمكنى من تخفيف آلام الخسارة عن زوجك بأى طريقة.\nلو أنتى بتشجعى فريق مختلف عن زوجك، فبلاش شماتة خالص لو فريقك فاز عشان هيعتبرها إستفزاز والموضوع هيكبر.\n10- لو فريقه كسب اعملى حفلة\nلو الفريق اللى جوزك بيشجعه كسب اعملى حفلة مش لازم تكون بطرق غالية، ممكن بطريقة بسيطة تفرحيه ويحس أنك بتشاركيه أجمل لحظات الفرحة مع ناديه المتوج على عرش أفريقيا، جهزى بلالين بلون فريقه والبسى تى شيرت فريقه هيكون جو مبهج.