21 تصريحا ناريا لرمضان صبحي مع عمرو أديب: كنت بتحارب في الأهلي

حل رمضان صبحي لاعب نادي بيراميدز ضيفا على برنامج "الحكاية" مع الإعلامي عمرو أديب على شاشة "mbc مصر"، مساء أمس، وفتح عددا من الملفات التي تشغل جماهير كرة القدم المصرية خلال الآونة الأخيرة، متطرقا إلى كواليس رحيله عن القلعة الحمراء، خلال فترة الانتقالات الصيفية.

تحدث رمضان صبحي، عن الأسباب التي دفعته لعدم الاستمرار مع الأهلي، وخوض تجربة جديدة في صفوف بيراميدز، قائلا: "بدأت هنا في النادي الأهلي، احترفت من النادي الأهلي في إنجلترا، لكن جاتلي إصابة مع هيدرسفيلد عطلتني، ولما رجعت أخدت فترة بعد إصابة تانية، اتفرجت على ماتش الأهلي والترجي في إياب نهائي إفريقيا، أنا كنت بنهار يوم هزيمة الأهلي أمام الترجي، حسيت أني عايز أرجع الأهلي".

قال صبحي: "كلمت حسام غالي ومحمد فضل قولتلهم لازم أرجع مش قادر، مشيوا بعدها، لكن كملت المفاوضات مع أمير توفيق، كنت عايز أقدم حاجة كويسة، وأساعد بأي شيء، لكن في أول 6 شهور مكنتش في أحسن حالاتي مع الأهلي، وصلني إحساس غير مباشر أن فيه أشخاص جوه الأهلي مش عايزين رمضان صبحي بنفس القوة زي الأول، ومش عايزين أني أكمل مع الفريق".

أضاف رمضان صبحي، أنه تعجب من عدم وجود عروض خارجية له عقب تألقه مع المنتخب الأولمبي، وأنه لم يشعر برغبة جدية من الأهلي في ضمه، قائلا: "قعدت مع أمير توفيق بعد فترة التوقف بسبب الكورونا، وقولتله عايز أحترف تاني، ده طموحي ونفسي أحارب عليه، كانوا عايزين أني أكمل في الأهلي عشان إفريقيا والدوري، بس كنت حاسس بأنهم مش عايزين يشتروني".

وتابع: "مكنش في عروض بتيجي لوكيلي وكانت علامة استفهام كبيرة، لأني لعبت بطولة كويسة مع المنتخب الأولمبي، النادي بدأ يتحرك مع ضغط الجمهور، حسيت أن في 24 ساعة في ضغط كبير عليا، العلاقة بيني وبين نادر شوقي كويسة جدا، وأنا احتراما ليه كان فيه ناس بتجيلي عروض بس كنت قافل الباب".

أشار رمضان صبحي، إلى أنه شعر بالغضب، من تسريب تفاصيل مفاوضاته مع إدارة القلعة الحمراء، ورغبته في الاحتراف عبر برنامح أحد الإعلاميين.

كشف رمضان: "خلال مفاوضاتي مع الأهلي، طلبت من أمير توفيق الانتظار يومين أو ثلاثة في انتظار عرض احترافي، كلمت صديقي علي صقر، وكنت عايز أحترف بره، كنت بقول لأمير توفيق يبلغ التفاصيل لكابتن الخطيب وأشوف بليل إعلامي بيقول أخبار العروض اللي بتجيلي، وبيقول كلام مش حقيقي أني بخلص مع الأهلي مع أني كنت بتفق أني أحترف بره، وأول حد عرف أن بيراميدز كلموني هو أمير توفيق".

وأوضح رمضان صبحي، أنه أبلغ أمير توفيق بقراره بالانتقال إلى بيراميدز، وطالبه بإبلاغ رسالتين لمحمود الخطيب رئيس القلعة الحمراء، حيث كان يرى أن الأهلي لم يكن يرغب في إنهاء الصفقة مبكرا، وتركه مثارا للجدل لفترة طويلة.

قال رمضان صبحي: "بعدما قررت الانتقال لصفوف بيراميدز، قولت لأمير توفيق أني بنسبة 80% حسمت قراري رحيلي إلى بيراميدز، وطلبت منه يبلغ الكابتن الخطيب رسالتين، أني ممضيتش، ولا خدت فلوس زي ما قال البعض وقتها".

أضاف صبحي: "أنا أكتر حاجة تضايقني لما حد يفكر في مصلحته الشخصية على حسابي، في ناس كانت بتصدر حاجات ضدي مش صح، الأهلي لو كان عايز يخلصني كان خلص من بدري، لكن سابوني لحد شهر 7 في جدل".

كشف رمضان صبحي المنضم حديثا لصفوف فريق بيراميدز، ولاعب هيدرسفيلد تاون الإنجليزي والأهلي السابق، وجود خلافات سابقة بينه وبين سيد عبدالحفيظ مدير الكرة بالفريق الأحمر.

أوضح رمضان: "كان فيه مشادات بيني وبين سيد عبد الحفيظ، ومكنتش غلطان في أزمتي مع بادجي، كنت بقوله باصي أكثر من مرة، اتعصب واتضايق، وأنا كنت مقدر ده، وبلغت لاعبي الأهلي أني رايح أصالحه بعد التمرين، وأنا داخل الأوضة قابلت كابتن سيد عبد الحفيظ قالي هيتخصم منك فلوس، قولتله ليه أصلا أنا مش غلطان، وحضرتك مش هتخصم مني حاجة".

تحدث رمضان صبحي عن كواليس خلافه السابق مع سيد عبدالحفيظ مدير الكرة بالقلعة الحمراء، عقب الهزيمة التاريخية التي تعرض لها الفريق الأحمر أمام صن داونز بخماسية نظيفة في دوري أبطال أفريقيا.

وقال "اتخصم مننا 10% من الراتب السنوي بعد هزيمة صن داونز التاريخية، واللاعيبة كلها وافقت، أنا اللاعب الوحيد اللي اتخصم مني 10% على سنتين، الـ6 شهور الإعارة والسنة اللي بعدها، وأبلغت محمود الخطيب رئيس النادي بما حدث قالي استحالة، وبعدها عرف أنه حصل بأوامر من سيد عبد الحفيظ".

وأضاف: "كنت كل ما أسأل كابتن سيد يقولي شوف كابتن الخطيب، على أساس أنه عارف كل حاجة واكتشفت أن دي مش حقيقة، للأسف البعض استخدم الجمهور ضدي".

كشف رمضان صبحي حقيقة الأزمة التي أثيرت حول إعلان قام بتصويره قبل رحيله من الأهلي بيومين فقط، وأكد غضبه من اتهامات الإعلامين له بالحصول على المقابل المادي بدون وجه حق.

وقال صبحي: "حزنت من حديث البعض عن أني صورت إعلان خلال تواجدي في الأهلي وقبل الانتقال إلى بيراميدز بيومين، ليه لما رجعت فلوس الإعلان بعد رحيلي عن الأهلي الإعلام مطلعش اتكلم، ومكنتش هصور الإعلان لأن الأهلي كان عايز نسبة النادي ودفعتها، ومكنش حد يقدر يقاضيني أنا رجعت الفلوس أدبيا، لأن مكنش ينفع اتسبب ليهم في ضرر، لأن الإعلان مبقاش ينفع ينزلوه، وأشكر ميدو لأنه الوحيد اللي اتكلم عن الموضوع ده".

عن طبيعة علاقته الحالية مع أمير توفيق مدير التعاقدات بالنادي الأهلي، قال رمضان صبحي: "قابلته مرة بعد رحيلي عن النادي وروحت أسلم عليه، سلم عليا بشكل مش لطيف مكنش عايز، لكن أتمنى الأهلي يتوج بلقب إفريقيا، وأكيد بطولة أفريقيا تتحسبلي".

قال رمضان: "عندما سأواجه الأهلي سيكون يوما غريبا بكل تأكيد، لكن هقدم 100% من اللي عندي، وده طبيعي ضد كل الفرق، على قد زعل الناس دلوقتي بشوف في عيونهم مدى حبهم ليا، أنا كنت من جمهور الأهلي، وكنت بسافر ورا النادي من وأنا عندي 10 سنين، وجمهور الأهلي ليهم حق عليا أكيد".

أكد رمضان صبحي أن هناك أشخاصا داخل القلعة الحمراء، سهلوا عليه عملية الرحيل عن الفريق، التي كان يراها صعبة عليه، مؤكدا غضبه من المراحل الأخيرة في التفاوض مع الأهلي، عقب وصول عرض بيراميدز.

رمضان صبحي، تحدث عن أن : "الأهلي اتعامل مع بيراميدز وخد منهم أفشة، وفي لاعيبة هتروح ولاعيبة هتيجي، والعلاقة بينهم كويسة،، أكيد ممكن أرجع الأهلي أو وارد كل حاجة عند ربنا، مفيش حاجة بعيدة، رحيلي عن الأهلي كان صعب لكن في ناس سهلته عليا، وأبلغت لاعبي الأهلي بقراري، وأمير قال لنادر شوقي، رمضان قدامه ساعة ويرد علينا بقراره النهائي وده ضايقني، ده مستقبلي كله إزاي ساعة واحدة أحسم فيها كل حاجة، هو أنا مش هفكر ولا إيه".

تطرق رمضان صبحي لشقيق زوجته وحارس الأهلي السابق شريف إكرامي، وكواليس رحيله عن الأحمر إلى بيراميدز: "شريف إكرامي لم يرحل عن الأهلي بسببي، اتخذ قراره منذ شهر فبراير الماضي، وتغريداته كانت لتوضيح أنه لم يكن له دور في أي شئ متعلق بي وأن النادي لم يأخذ رأيه".

أضاف: "شريف إكرامي خرج بشكل كبير من النادي الأهلي، والبعض من مجلس الإدارة وأشخاص داخل النادي الأهلي استكثروا عليه الخروج بتلك الطريقة".

أكد رمضان صبحي: "سأرحل عن بيراميدز في حالة وجود عرض جيد في أوروبا، حلم الاحتراف مش هيروح مني".

واستكمل: "مكنتش عارف أن يوم رحيلي هو يوم افتتاح ستاد الأهلي، الانتماء هيفضل جوه قلبي مش هيتغير، لكن أنا مقتنع بالخطوة دي وخدتها لأنها الأنسب ليا، لأن الناس في بيراميدز تعاملوا معايا باحترافية شديدة، اللاعيبة اللي هناك كويسة جدا، لو أنا في الأهلي وخدت بطولة عادي، لكن مع بيراميدز طموح مختلف وهيبقى إنجاز مع الإدارة دي، ولما قولت أني رايح أحقق طموحاتي مزعلتش من سخرية الجماهير على تصريحاتي لأنهم مفهموش وجهة نظري، وضحكت عادي".

قال رمضان صبحي إن النادي الأهلي له فضّل كبير عليه: "لحم كتفي من خير الأهلي وجمهوه على راسي من فوق وأنا ابن النادي ورفضت الانتقال للزمالك مع كامل احترامي له ولجماهيره، ولكن كان صعب، والأمر في بيراميدز مختلف فالعلاقات ممتازة بينه وبين الأهلي والدليل تبادل الصفقات وأخرها محمد مجدي أفشة وصفقات أخرى".

شرح صبحي: "الزمالك تقدم بعرض لضمي لنادي هيدرسفيلد، الزمالك نادي كبير وجمهوره كبير، لكن هل ممكن أروح الزمالك؟ لا، صعب أروح الزمالك، أنا اتربيت جوه الأهلي ولحم كتافي من خيره، ولو سألت شيكابالا هل يروح الأهلي هيقول لا برضه نفس الحالة".

حذرت شركة جوجل، خلال شهر أكتوبر الجاري، من 261 تطبيقا خطيرًا يمكنه التجسس على هاتفك، أزالة الشركة 243 منها، وتخضع باقي التطبيقات للتحقيق، الأمر الذي يهدد خصوصية