نادية الجندي عن زوجها الأسبق عماد حمدي: كان بيحارب ظهوري بسبب الغيرة

تذكرت الفنانة نادية الجندي زوجها السابق الفنان الراحل عماد حمدي، وعلقت على ما ذكره في مذكراته ونصيحته بعدم الزواج من فتاة أصغر منهم، وأنه تركها ولم يندم على الأموال التي أنفقها في إنتاج أعمال لها.

وقالت "الجندي"، خلال لقائها مع الإعلامي وائل الإبراشي في برنامج "التاسعة" المذاع عبر القناة الأولى بالتلفزيون المصري: "لا يا أستاذ وائل الكلام ده مش مظبوط وفيلم "بمبة كشر" ده إنتاجي أنا وأنا كان عندي بوتيك أزياء وكان بيحقق إيراد كبير قوي وانا حبيت أحقق ذاتي".

وكشفت "الجندي" كواليس علاقتها بزوجها الأسبق عماد حمدي: "كان فيه غيرة وكان وضع طبيعي بسبب فرق السن والغيرة هي اللي دمرت حياتنا وكانت غيرة شديدة جدا ووصلت للتحطيم وهو اتجوزني وأنا فنانة واشتغلت معاه فيلم وكان مش عاوزني أكمل خالص في الفن بعكس الناس ما كانت فاهمة أني اتجوزت عماد حمدي عشان أنا وجه جديد وعايزة أصعد وأطلع"

وأضافت: "أنا من يوم ما اتجوزت عماد حمدي مساعدنيش أبدًا في أي عمل وكان السيناريوهات بتيجي له بيشتغل كتير جدا وفيه أدوار بنات وأقوله يا عماد رشحني يقولي هو أنا هقولهم خدوا مراتي، وأنا اقوله أنا مراتك وفنانة وانت مش هتفرضني أنت بس هتقول الدور ده تليق فيه نادية وكان بيرفض ويقول لا يمكن".

وتابعت: "كان بيحارب ظهوري بسبب الغيرة وكان مش عايزني أظهر ولا أنجح وهو كان متخيل أني لما أنجح ممكن أسيبه وكان بيحارب ظهوري بكل الطرق وأنا فنانة والفن في دمي وده كان عامل لي حالة نفسية شديدة وجوازي من عماد حمدي عطلني وفي فترة جوازي من عماد حمدي معملتش أي حاجة".