طبيب بالقومي للأورام عن اكتشاف حالات كورونا: الإصابات من فترة وكنا بنتهدد بالرفد إذا اتكلمنا
كتب : فكرية محسن
قال الدكتور أرميا محسن شفيق، نائب تخدير ورعاية مركزة بالمعهد القومي للأورام، إنه تواصل مع إدارة المعهد بقدر استطاعته ولكن تم تهديده بأكثر من شكل وتلميح وبطرق مباشرة بالرفد أو الفصل بسبب الحديث الكثير والاعتراض على الخطأ، موضحًا أنه يتحدث بسبب تعريض حياته وزملائه والمرضى وأهله للخطر، خاصة أنه تم تأكيد إصابة 15 من الفريق الطبي بفيروس كورونا المستجد كوفيد 19.
ولفت إلى أنه " بعدها بدأ يظهر تمريض داخل المعهد مصاب وفضل يجي المعهد أيام و هو مصاب وأحنا منعرفش فاتعدى منه مرضى وأطباء وتمريض، اترفض عمل مسحات لكل المخالطين ليه واتقال بالبق اللى مخالط ليه يعزل نفسه بس كله فضل فى مكانه وشغالين بكامل طاقتنا لحد لما ظهر بعدها حالات تانية لتمريض وأطباء وبدأت مسحات الأطباء بتطلع إيجابى حتى لو مش عندهم أعراض مما يعني احتمالية بنسبة ١٠٠٪ أننا تحولنا لأداة نقل العدوى كأطباء وفريق طبي بنعدي بعض وبنعدي المرضى وأهاليهم اللي بيجوا المعهد ويمشوا وبنعدي أهالينا اللي بنروحلهم بيوتنا، كل ده وأحنا كلامنا بيتاخد باستخفاف واللى صوته يعلى أو يعترض يتقال عليه بتاع مشاكل ويتهدد بفصله أو تعطيل تثبيته والمعهد كما حذرنا جميعنا كنواب وتمريض الفترة اللى فاتت بقى أكبر مكان فى مصر طالع منه حالات إيجابي يوميا ، الحالات اللي طالعة مننا بيتصلوا بينا يبلغونا أننا إيجابى ولازم نتعزل و أحنا جوة المعهد وشغالين مع بعض ومع المرضى".
وأضافت أرميا شفيق: وحتى أدوات الحماية اللي بنستخدمها فهى مجهودات ذاتية تم توفيرها بمعرفة أساتذتنا فى بعض الأقسام ولا تكفي الجميع و لا تكفينا لمدة بعيدة وأي حد فينا بيتكلم فى غلق المعهد وعزله وتعقيمه وعزل كل العاملين فيه علشان يحمي نفسه وأهله وزمايله والمرضى بيتخون ويتهم أنه بيتدلع و مش عاوز يشتغل و الناس اللي بيترفض يتعملها مسحات و بتطلع تعملها برة بتطلع إيجابي ، أحنا حياتنا فى خطر زايد عن أي خطر بيواجه أي حد الفترة دي #أحنا_فى_كارثة #أغيثونا #معهد_الكورونا.
Comments