هددوها بالفصل.. صيدلانية حذرت من تحول معهد الأورام لبؤرة نقل فيروس كورونا (صورة)

نشرت الدكتورة هاجر عصام الصيدلانية بالمعهد القومى للأورام، تعليقًا حول حقيقة ماحدث فى المعهد بعد إعلان إصابة 10 أطباء في المعهد القومي للأورام بفيروس كورونا المستجد، ونقلهم إلي مستشفي العزل، وتعرضها للتهديد والفصل.

وعلقت الصيدلانية بالمعهد على صفحتها عبر موقع التواصل الاجتماعي فيس بوك: “طب يا جماعة بس للتوضيح يعنى، انا بهاتى من اسبوع او اكتر انا و زمايلى و ادارة الصيدليات فى ان اللى بيحصل دة غلط و كدة هيبقى المعهد بؤرة لتفشى الكورونا و لازم حضرتك تاخد اجراء باغلاق المعهد و تطهيره بالكامل عشان كدة احنا بننشر المرض عشان بيجيلنا مرضى من كل انحاء مصر، بس كنت بنزل لخدمة المرضى.

وأضافت: “أنا و زمايلى كنا و واخدين كل احتياطاتنا اللى وفرت هالنا ادارة الصيدلية و تشكر طبعا عليها عشان ملهمش ذنب فى اللى بيحصل، المهم اننا اجتمعنا امبارح “الخميس ٢ ابريل” مع عميد المعهد دكتور حاتم ابو القاسم بناء على طلبنا من مديرة الصيدلية اللى طبعا شاكرة اخدت منه ميعاد عشان نوصل صوتنا، و فعلا قولناله اننا عاوزين المعهد يتقفل للتعقيم و الناس تقعد فى بيتها اسبوعين (اللى هى فترة حضانة الفيروس) لحد ما نعرف بس لو حد تعبان او بانت عليه اعراض.

وتابعت:” هو طبعا رفض و بشدة و كان رده عليا لما قولتله ان احنا كدة بنئذى بعض و المرضى و بلد كاملة انه يقول لى: “لو خايفة على نفسك من الكورونا يا دكتورة اتفضلى قدمى استقالك و متجيش”.

وذكر الدكتورة “هاجر”: الدكتورلا حاتم كان رده على ناس بتناقشه ان الصيادلة رافضين ينزلوا غير لما يتم تعقيم كامل، ان “لو الصيادلة مش هينزلوا هناخد اجراء ضدهم و لو كلهم مش نازلين مش مشكلة هنجيب غيرهم”.

وعلقت على تصريحات المدير للقاهرة 24″ وقالت :”فيه بقى صورتين هنا فيهم خبرين محصلوش اولاً الدكتور حاتم ذكر ان اتعمل مسحة كاملة على المعهد، دة يا جماعة محصلش و ربنا يشهد على كلامى. متعملش حتى مسح لكل للمخالطين بأول حالة شوية منهم بس اللى اتعمل لهم مسح و الباقى اتعزلوا فى بيوتهم و الله اعلم مين تانى كان اتعامل معاه بس ميعرفوش بالاسم لان المعهد حلقة و كلنا بنتعامل مع بعض ب شكل او بآخر (يعنى اكيد فيه carriers ماشيين وسطنا كلنا و بختلطوا بكل الناس”.

وأضافت: “ثانيا الدكتور حاتم ذكر انه تقرر غلق المعهد ٣ ايام حتى يتم تطهيره، مش دى المشكلة، المشكلة انه بيقول ان المعهد اتقفل ٣ ايام منهم يوم كان اصلا شغل عادى و اليوم اللى اجتمعنا معاه فيه عشان نطلب منه يقفل المعهد عشان الموضوع ميكبرش و هو اصر انه مش هيقفله بس قال هيجيب شركة تعقم المبنى قبل الشغل يوم الجمعة (اللى هو اجازة صيدليات الصرف بس فيه ناس كتير قدروا ينزلوا يفتحوا و فعلا اتعقمت بس انا صيدليتى متعقمتش عشان محدش فينا عرف ينزل الجمعة) ف لأ الكلام اللى مكتوب مش صح ولا الاجراءات دى اتتاخدت ولا كان عاوز يسمع حد فينا و كان قراراه محسوم بان الشغل مستمر و اللى مش هييجى هيتتاخد ضده اجراء و اللى مش عاجبه سياسة المكان يتفضل يقدم استقالته”.

بين خبيثين، يجد نزلاء معهد الأورام من طاقم طبي وممرضين أنفسهم للمرة الثانية يحاصرهم الورم اللعين، وهذه المرة فيروس كورونا المستجد بعدما أعانتهم يد الرب من حريق الحادث الإرهابي في شهر أغسطس من العام الماضي 2019.

وأعلن الدكتور حاتم أبو القاسم مدير معهد الأورام، إصابة 15 من الطاقم الطبي بفيروس كورونا المستجد، مضيفاً لـ”القاهرة 24″، أن ممرض نقل المرض لزملاءه، وبعد عمل مسحة كاملة على المعهد، تأكدنا من إصابة 12ممرض و3 أطباء.

وأضاف الممرض “س.م” فى تصريحات خاصة للموقع، أن المستشفى كان بها حالة إصابة بفيروس كورونا المستجد، إلا أنه تأكد عدم أصابة أي شخص أخر داخلها، مؤكدا أنه لم ينقل العدوى من المستشفى وأنما من مصدرها مجهول، وشعر ببداية الأعراض يوم الأحد قبل الماضي.

وأشار الممرض “س.م”، إلى أنه فور شعوره بالأعراض توجه لمستشفى المنيرة، وتم وضعه على اختبار النقاط، وأكدوا على ضرورة عرضه على الحميات لعمل تحليل pcr فيروس كورونا، وكان من المفترض ذهابه لحميات العباسية، إلا أنه قرر الذهاب لحميات حلوان خوفا من الازدحام الشديد، وفي نفس الفترة تعامل مع أحد زملائه من التمريض بمعهد الأورام والذي لم يذهب للمعهد وأنما عاد لبلدته وتأكد من إصابته وتم عزله هناك.

وأكد الممرض، أنه تأكد من الإصابة بالفيروس يوم الأربعاء الماضي، ليتم وضعه في مستشفى العزل في حلوان.