بسبب "كلب وراح".. ندى رحمي تتعرض لهجوم من محبي الحيوانات وتعتذر لهم

تعرضت المذيعة ندى رحمي، لهجوم شديد من محبي الحيوانات، وأعضاء مجموعات الرفق بالحيوان، بسبب تصريح لها عن كلبها، تبين خلاله، أنها تعامل كلبها بطريقة غير جيدة.

البداية كانت بسؤال الفنانة نهال عنبر، والفنانة هيدي كرم، في بداية حلقة برنامج "كلام ستات"، المذاع عبر فضائية "ON E"، عن حالة الكلب الخاص بندى رحمي، لترد عليهم: "الكلب عايز مراعاة، وفي نفس الوقت مش مسليني، ده مصدعني، ولعبه غبي قوي، وفرهود قوي، وطنطيته بيقطع المناديل".

لترد عليها نهال عنبر "اديه لحد بيحبه من غير ما تبقي مكتئبة نفسيا"، واستكملت هيدي كرم: "أديه لحد قبل ما يتعلق بيكي حرام".

وقالت "رحمي": "يتعلق بيا ايه هو بيشوفني أصلا ده مرمي في البلكونة" لترد عليها هيدي كرم  متسائلة: "انتي بتسيبيه في البرد ده في البلكونة؟" لترد عليها ندى: "أومال هوديه فين هنيمه جنبي على السرير".

واستطردت نهال عنبر: "انتي بتهزري ده يموت"، وردت رحمي: "لا ماهو أنا بعمل له سشوار وأدفيه، وبعدين يا جماعة خلاص بقا ده كلب وراح".

وعاتبتها هيدي كرم: "تسيبيه في البلكونة، وهو عنده 3 شهور يسقع"، وردت: "اسيبه في البلكونة ولا أدخله يبهدل لي الدنيا"، وطلبت الدخول في موضوع الحلقة.

وتعرضت ندى رحمي، لهجوم من محبي الحيوانات الأليفة بسبب موقفها من الكلب، الذي تتركه في البلكونة، في هذا الطقس البارد.

ردت ندى رحمي عبر فيديو نشرته عبر صفحتها الرسمية على موقع التواصل الاجتماعي "فيسبوك"، قائلة: "أنا مبسوطة أن وعي الناس بخصوص الحيوان زاد في حياتنا، وأن الناس بدأت تتعاطف مع الحيوان، وعلشان أكون منصفة أنا مبسوطة جدا جداـ ومش عيب إن حد يغلط ويسيئ التعامل مع حيوان الناس، تقوله أنت غلط وخلي بالك".

وتابعت: "الكلب ده مكملش شهر عندي، وقعد أسبوعين وهو ملحقش يقعد شهر، وأنا مقدرتش اتحمل مسؤوليته أسبوعين وخفت أشيل ذنبه، قدام ربنا وخفت أشيل مسؤوليته شهر"، مضيفة: "الكلب ده جالي هدية من صديقة، وهي المفروض إنها مسافرة، وعايزاني استضيفه عندي، وأنا فاهمة إني طالما ارتضيت إني أجيبه يبقى أشيل مسؤوليته، ودي أول مرة في حياتي أربي كلب، وأول مرة أشيل مسؤولية كلب".

وتابعت: "الكلب هيبور جدا لأن سنه صغير، وأنا معرفتش استوعبه، واستوعب شقاوته، وأنا حسيت إني هشيل ذنب كبير، أنا مش قده وقررت أدي الكلب لصديقة مش مصرية، ترعاه لأن ده روح".

وقدمت "رحمي"، اعتذارها لكل من آساء فهمها: "الموضوع حكيته بتلقائية في التلفزيون، وبعتذر للناس على جهلي، بتربية الكلاب، وأنا عايزة أقول إن بيبقى عندي شغل، وكنت بضطر أروح، لأن فيه روح في البيت مسؤولة مني، وهو قعد عندي 14 يوم ،علمني فيهم الأدب، وبوعدكم إني مش هربي كلاب تاني، إلا لما أبقى جديرة بأني أربي روح، لأنها مسؤولية كبيرة أمام ربنا".