"فضح نفسه".. المقاول الهارب يكشف مخططه لتخريب البلاد

نشر المقاول الهارب محمد علي، فيديو لمحادثة دارت بينه وبين حسين بديني، أحد الهاربين في الخارج، على صفحته الرسمية على "فيس بوك"، كشف فيها مخططاً تخريبياً للبلاد.

وقال حسين بديني: "كنت لحد فترة قريبة جدا مراسل قناة الشرق في ألمانيا، ولفترة قريبة جدا كنت مسؤول ملف الإعلام في حزب غد الثورة، بتاع أيمن نور، وكنت دراعه اليمين، لحد فترة قريبة".

وأضاف: "أما حصلت خلافات بقناة الشرق، انسحبت واستقلت، وأعلنت دا بشكل علني، ولو سألت عني سامي كمال الدين، وهو أخويا وصاحبي هيقولك كدا، وانسحبت وعلاقتي بأيمن نور مش كويسة حاليا، خصوصا إني عندي إحساس إنه مش جاد في موضوع الثورة، وشايفه بتاع مصلحته، وأنهيت علاقتي بيه ولست آسفا على ذلك، لكن لو فيه حاجة مهمة تخدم البلد أو الثورة، أنا مستعد أتعامل تاني مع أيمن نور وأروح لحد عنده واعتذرله لو كان زعلان".

ليرد المقاول الهارب: "بص يا باشا، لو متابعني، فأنا بجمع كل اللي ليه علاقة بالثورة وضد النظام، تعرف تفيدني بإيه؟".

بديني: "على المستوى الشخصي المجموعة بتاعت ألمانيا وهولندا وفرنسا، اللي هي مش قليلة ممكن أجمعهم على قلب رجل واحد وراك، وعلى المستوى الإعلامي فالتواصل مع كل الرموز على السوشيال ميديا، اللي معظمهم حبايبي زي بهجت صابر وخالد السيرتي ومحمد شوبير، وغيرهم، وطبعا حبيبي تامر جمال، اللي عمل حملة مباشرة قوية تكون وراك، وعلى المستوى الثوري هنظم مظاهرات ووقفات احتجاجية أمام السفارات المصرية في أوروبا عندما يستدعي الأمر".

المقاول الهارب: "كلام جميل، تامر اللي هو الجوكر؟، هو ليه عامل الشو ده، إيه لزمة ماسك وميك أب؟ هل هو دا اللي هيجهز الناس؟".

بديني: "تامر أخصائي نفسي ومعالج نفسي زيي بالظبط، وتخرج في الدفعة اللي بعدي وبيلعب اللعبة دي وهي لعبة نفسية ثورية، شخصية الجوكر مقتبسة من شخصية مرعبة مخيفة، لها وجود في السينما العالمية، وكان فيه فيلم مشهور قوي بيخوف ويفزع كل اللي هو غير راضي عنهم، دا على المستوى النفسي والثوري، وبيعمل المكياج عشان يدخل الثوار المصريين في القصة والموضوع ويلقي الرعب في قلب النظام، وبيلعب لعبة نفسية وأنا شايف إنها مفيدة".

محمد: "هو ليه متابعين كتير؟ وتفتكر كام واحد معاه بجد؟".

بديني: "الطريقة بتاعته والأسلوب بتاعه فيه ناس مش بيفهموها، وهو ميقدرش يقول إننا لازم نرفع السلاح وندافع عن نفسنا، لكن في نفس الوقت نأكد على إننا مش هنستخدم نفس الأسلوب الطري بتاع الإخوان بتاع سلميتنا أقوى من الرصاص".

محمد: "أنا سمعت إنه عامل دمج مع حاجات تانية، حركات تانية، أنا بجمع كل اللي أقدر عليه دلوقتي، وائل غنيم طلع مريض نفسي وعبيط وهربت منه، وعمرو واكد مش عارف يرجع مصر، وبهجت صابر ملوش شعبية عشان لسانه".

بديني: "أنت كدا أخدت مني معلومات مهمة جدا، طبعا مستعد إني أضيفلك كتير مع إني واثق إن أنت محمد علي، لكن معلش خليني أتأكد أكتر، اتصال هاتفي صغير على تليفون البيت عندي اللي مش بيسجل ولا ممكن يعمل أي مشكل إني أسمع صوتك".

ليرسل له محمد علي تسجيلا صوتيا: "أحلى صباح، نكمل كلامنا يا نجم، كدا اطمنت".

بديني: "اطمنت، نكمل كلامنا، بكلمك بأمانة، ظهورك مع وائل غنيم مكنش ميزة بالنسبالك دا شدك معاه في الطين، وشكك ناس كتير في مصداقيتك، وائل غنيم كارت اتحرق خالص، والبعد عنه على الأقل حاليا، خصوصا إنه ظهر بالشكل المرضي دا، أما بهجت صابر له شعبية لكن ليه شطحات، وبقاله أيام بيخرف يمين وشمال وبتفرج وبراقب من بعيد كمعالج نفسي، وشغلي أسمع أكتر ما اتكلم، وعمال يخبط في تامر جمال، وهو ليه متابعين بس محتاج تصحيح مسار".

محمد: "أنا عندي تحفظ شديد على بهجت صابر".

بديني: "من ناحية إيه بالظبط؟".

محمد: "ألفاظه وأسلوبه وكلامه، تخلي الناس تنفر منه".

بديني: "أما عن ياسر العمدة فهو توأمي، كنا مع بعض في ثورة الغلابة واللهم ثورة وكنا مؤسسينها، إحنا في مرحلة بتقول إن فيه فوبيا بتقول إن المتعاطفين مع الإخوان عندهم خوف من الدقن وعلامة الصلاة، ابعد خالص عن الناس اللي حتى معانا في الصف، بس السؤال إيه هي الخطة أساسا اللي أنت هتمشي عليها، وفيه أسئلة الناس بتطرحها زي أنت فين ومين".

وتابع بديني: "الناس كانت مفكره إنك بتتحرك ووراك ناس في الجيش ووراك ناس على الأقل مش راضيين عن الوضع اللي في مصر، اتضح إن مفيش تواصل كبير بينك وبين قيادات كتير في الجيش، ولازم تعرف إيه إمكانياتنا ومين اللي ورانا وخطتنا إيه".

محمد: "المشكلة إني معنديش وقت، 25 قربت، الخطة دلوقتي إني عايز أجمع أكبر عدد من الناس اللي ليها شعبية، وكل واحد فيهم ليه ناسه، لو جمعت كل واحد ولو عنده 100 شخص، هنجمع في الآخر عدد، اللي حصل معايا إن الأمن كان أقوى بكتير من العدد اللي نزل، لو فيه 50 ألف واحد نزلو خلصت، أنا مش عايز حد يتحسب عليا ويبقى ثغرة، زي وائل مثلا أنا كنت فاهم إن دماغه فيها حاجة تانية طلع مفيهاش حاجة أصلا".

بديني: "المطلوب منك إنك هتقول، في الفترة من 15 يناير لـ 30 يناير، الناس تكون جاهزة بأكبر قدر ممكن، لما اتصورت ونزلت صور كتير في أسبانيا، الناس بتشك إنك فرحان بالشهرة، أمال فين الحراك الثوري، والسؤال بتاع هل هترشح نفسك في الانتخابات، وقلت آه دا غلط، لأنك اديت انطباع أو تصور، إن محمد علي الموضوع مش بالنسباله ثورة دا بيطمع في السلطة، الدستور بينص إن المرشح للانتخابات لازم يكون حاصل على مؤهل عالي، وأنت مش حاصل على المؤهل دا، فكان لازم كلام يعدي على ناس زينا يفلتروه".