مكتشف رمضان صبحي: موهبته واضحة من البداية.. ولعب مع الفئات الأكبر منه

رمضان صبحي لاعب المنتخب الأولمبي

تحدث محمود نصر، المدرب الأول للاعب رمضان صبحي في منطقة أرض اللواء، عن تفاصيل بدايات لاعب الأهلي والمنتخب الأولمبي عندما كان في عمر الست سنوات.

وقال نصر، في تصريحات تليفزيونية أدلى بها لقناة "أون سبورت": "رمضان جالي وهو عنده 6 سنوات بس، لكن رغم صغر سنه كان باين إن عنده الموهبة اللي توصله للمستوى اللي هو فيه حاليًا".

وأضاف: "إمكانياته كانت عالية جدًا وقوته البدنية كانت أكبر من سنه، كنت بلاعبه مع السن اللي أكبر منه ومكانش بيفرق معاه، وفي كل مكان كان بيظهر وبيؤدي".

وواصل حديثه: "رمضان له موقف معايا مش ممكن أنساه، كنا بنلعب أمام نادي الصيد وكانت أعمارهم أكبر منه، ولما قولتله قوم سخن قالي أنا خايف، لكني حمسته وطمنته ونزل أدى مباراة كبيرة".

وتابع: "المباراة التالية لعب أمام مزارع دينا، ولفت الأنظار بشدة حتى أن نادي الترسانة طلبه، وبعدها فكرت إنه لازم يتسوق ويلعب في نادي كبير".

واستكمل: "وديته دورة رمضانية في منطقة الطالبية، ومنها راح على النادي الأهلي، عمل اختبارات في الأهلي يوم الإثنين، يوم الجمعة كان بيلعب مع الفريق أمام هيليوبليس".

وكشف عن موقف طريف جمعه برمضان صبحي: "سألته هيلبس كام مع الأهلي قالي رقم 9، قولتله ليه ماخدتش رقم 10 قالي عشان بحب عماد متعب".

واختتم اشادته باللاعب قائلًا: "رمضان صبحي قادر على اللعب في كل مراكز الملعب، حتى أنه قادر يلعب حارس مرمى".