وجه الفنان رامي جمال رسالة إلى من دعموه وساندوه بعد إعلانه عن محنة المرض الأخيرة التي يمر بها منذ أكثر من عام.\nنشر رامي جمال عبر حسابه الخاص على Instagram صورة كُتب فيها: "الحمد لله أولًا وأخيرًا، أنا عاوز أقول كلام كتير عن اللي شوفته منكم، كلمة شكرا قليلة على مشاعركم وعلى رقي كلامكم وعلى الوقت اللي ضيعتوه علشان تحسنوا الصورة المظلمة اللي كانت في عيني أنا بقيت شايف الابتلاء ده هدية من ربنا علشان أشوف الحب ده والله دموعي مبتقفش وأنا بشوف كلامكم".\nتابع: "إوعوا تبخلوا على أي حد بدعم نفسي زي اللي دعمتوني بيه، إحساس الحب بينور الدنيا، بيرجع الروح والأمل اللي أنتم عملتوه ميتقدرش، ثانيًا عاوز أشكر زملائي الفنانين على كل كلمة حلوة وكل دعم شفته هي دي الروح اللي نفسي تفضل موجودة مش بس بعد المرض ولا الوفاة، الكلام الحلو قولوه على طول ليا ولغيري بيفرق جدًا".\nأضاف رامي جمال: "الحب بيغير الضلمة لنور ثالثا لكل القنوات اللي بتحاول تتواصل معايا من امبارح علشان تطمن عليا، بشكركم جدا بس أنا كتبت البوست ده علشان أنهي حمل على قلبي مش علشان أبقى تريند، بشكركم طبعا، بس أتمنى لما تقرروا تستضيفوني يبقى على عمل فني مش مرض، مقدر شغلكم طبعا بس أنا مش قابل فكرة مريض، أنا الحمد لله اتأكدت بكلام الناس اني مش خايف ومش هترفض فبلاش أي حاجة تتفهم غلط شكرا على اهتمامكم ومقدره".\nأكمل جمال قائلا: "أشوفكم في لقاءات فنية بعد نزول ألبومي ده أفضل نفسيا كتير ليا، ومفيش مانع ساعتها نتكلم عن إني إزاي اتعايشت بيه وهتعايش بيه، لو ليا عمر الحمد لله على الابتلاء الحمد لله على حبكم ودعمكم ده دين هعيش بيه، خلصتوني من سجن كنت عايش بيه كنت بصحى قبل ما أغسل وشي أعد البقع وأشوفها زادت ولالا، النهاردة صحيت نزلت وحبيت المحنة اللي ورتني قلوبكم وجمالها، شكرا من قلب قلبي". \nView this post on Instagram\nA post shared by Ramy Gamal (@ramygamalmusic) on Nov 12, 2019 at 9:15am PST