10 مواقف لا يعرفها الجمهور من حياة أحمد راتب... تسردها ابنته

في 14 ديسمبر رحل الفنان أحمد راتب عن عالمنا تاركا أعمالا خالدة يتذكرها الجمهور دائما.

صورة- زوجة وابنتا أحمد راتب في أحدث ظهور لهما

3 عوام مروا منذ وفاته، ولا زالت ابنته تشارك محبيه ببعض الذكريات الخاصة عنه.

كتبت لمياء راتب ابنة الفنان الراحل عبر "جروب" The Cultural Talk (Middle East) على Facebook، لتحكي مواقف مر بها والدها ولا يعرفها جمهوره، تتمنى أن يعرفها الجميع عنه:

-بابا أول لما اتجوز ماما كان لسه مش معروف ومش بيشتغل بالتمثيل بشكل منتظم، كان بيروح مبنى الإذاعة يفضل قاعد من 9 الصبح لحد الليل عشان لو حد طلب أداء صوتي يعمله و ياخد عليه 2 جنيه..

- مشهد نزوله البحر بالليل في فيلم "جزيرة الشيطان" كان متصور في شرم الشيخ في شهر يناير.

- وقت عرض مسرحية "الزيارة انتهت"، ترك والده متوفياً في البيت لم يغسّل بعد، وذهب لعرض الدور المسرحي و الإلتزام بمسؤوليته( الدور كان كوميدي).

- وقت عرض مسرحية "الزعيم" وفي طريقه للمسرح، توقفت الحركة المرورية تماماً وذهب للمسرح مشياً على الأقدام من ميدان الرماية حتى مسرح الهرم.

- أبويا توفى ولم يترك لنا حتى فاتورة تليفون متأخرة أو دين غير مدفوع.

-مرة كان قاعد في النادي وجت عصفورة مش شايفة الباب الزجاج خبطت فيه وقعت على الأرض، جابها البيت وفضل يراعيها لحد لما قدرت تطير..

- كان بيشتري خس مخصوص ويحوش الورق بتاعه عشان أختي تديه للسلحفاه بتاعتها تاكله.

- لما كان يجيبلي حاجة بحبها (حتى لو كيلو برتقال) لازم ياخدني من إيدي يوريها لي عشان يشوف الفرحة في عيني.

- آخر حاجة بابا عملها في البيت (في قمة ألمه و قبل وفاته بخمس أيام، و في وقت إنتظار عربة الإسعاف ) قبل ذهابه بالاسعاف للمستشفى مباشرة، غسل و قطع تفاحة لحفيده حمزه لمجرد انه قال قدامه عايز تفاحة..

- أبويا قبل ما يتوفى بأسبوع كان واقف بيمثل على المسرح!!

يشار إلى أن أحمد راتب توفي يوم 14 ديسمبر 2016 عن عمر يناهز الـ 67 عاما، بعد إصابته بأزمة قلبية مفاجئة نقل على إثرها إلى إحدى المستشفيات والتي توفي فيها.