ألوان الوطن| "الأهلي" خفف آلام المصريين بعد فوزه بالسداسية.. "حتى الزملكاوية فرحوا"

فرحة مصحوبة بالبكاء، انتابت الكثيرين عقب فوز النادي الأهلي على نظيره النجم الساحلي بسداسية مقابل هدفين في مباراة العودة للدور قبل النهائي في بطولة دوري أبطال أفريقيا، أمس، النتيجة التي خففت آلام وأوجاع كثير من المصريين بعد حادث الواحات الإرهابي، الذي حدث يوم الجمعة الماضية.\n"في ناس كتير بكت في الاستاد اول ما الماتش خلص".. قالها محمد أحمد، أحد مشجعين النادي الأهلي، الذي حرص على حضور المباراة، أمس، باستاد برج العرب في الإسكندرية، فنتيجة المبارة لم يكن يتوقعها على حد قوله: "الناس كلها مكنتش مصدقة النتيجة، احنا كنا كل ما نجيب جون كنا بنشجع تاني اننا نجيب اكتر بس مكناش متخيلين نكسب بـ6 أجوان، عشان كده انا واصحابي فضلنا نعيط من كتر الفرحة اللي دخلت قلوبنا رغم حزننا على شهداء الشرطة اللي كان قبلها بيومين".\nشعور "سامية" التي يعد "الزمالك" ناديها المفضل، لا يختلف كثيراً عن "محمد" الأهلاوي، رغم اختلاف انتمائهم، فجميعهما مصريين في النهاية بحسب قولها: "كنت بتفرج على الماتش مع اسرتي في البيت، ورغم اننا عيلة كلها زملكاوية، لكن الأهلي قدر يخفف علينا وجعنا على الحادث الارهابي اللي حصل قبلها، وفرحنا كأن الزمالك هو اللي كسب، وحسينا بروح حلوة جوانا اللي دخلها في قلوبنا هو الأهلي، بفوزه على النجم الساحلي، وعقبال النهائي".