السابلاي ليست وعلم فرقعة "البالونة"!

الحقيقة إن الواحد تعب وقرف من المدارس اللي أحوالها بقت عجيبة حبتين تلاتة!\nيعني السابلاي ليست اللي بيبعتوها مليانة طلبات غريبة مبهمة محتاجة خبير إستراتيجي يفك شفراتها ومحتاجة قرض من البنك عشان نشتريها والاعداد الخزعبلية اللي بيكتبوها قاصدين بيها ايه!\nبيطلبوا ١٨ براية ليه! طب ٢٠ أستيكة ليه هتمسحوا بيها الماضي! طب ٦ كراتين أقلام رصاص ليه!\nيعني الطلبات بالأعداد دية كلهاااااا ليه! مش فاهمة والله!\nما كل طفل يروح بمقلمته فيها قلمه واستيكتة وبراية وألوانه وشكراً!\nلا ازاي لازم ندفع ونغرم!\nوياريتها بتيجي على قد السابلاي ليست ونخلص!\nدة غير بقى النوتس اللي طول السنة بيبعتوها هارينا دفع\nهنعلم الولد فن الزراعة "ادفع"\nديش بارتي "أبعت ٢٦ قطعة كاب كيك من نولا" يعني ادفع بس بطريقة شيك!\nصورة للطفل وهو بيتّاوب "ادفع"\nصورة للأطفال وهما لابسين اليونيفورم كامل (اللي انت اصلا دافع فيه قد كدة) "ادفع"\nهنحتفل بيوم البتنجان العالمي "ادفع"\nهنجيب بلالين ونفرقعها عشان نعلم الطفل علم "الفرقعة" والمدرسة هتتكفل بتمن البلالين متقلقش بس حضرتك "ادفع تمن الدبوس" وما ادراك ما تمن الدبوس في المدارس الإنترناشيونال!\nوهكذا من ادفع ادفع ادفع\nارحمونا وزقوا السنة معانا الله يكرمكوا!\nاحنا يادوب مجمعين المصاريف بالعافية يا أفاضل فالرحمة حلوة!