إزاي تساعد مراتك في البيت؟ - سوبر راجل

El-Omda يناير 6, 2017 العلاقات اضف تعليق 248 زيارة\nوصلت لمرحلة الوحش وربنا كرمك واتجوزت يا معلم، كدا لازم تجهز نفسك لحياة جديدة، شركة بينك ومراتك، ولازم يبقى فيه تعاون وتقسيم مسؤوليات وتظبيط حركات، ومهم جدًا تساعد مراتك في البيت على قد ما تقدر.. إزاي بقى؟ تعالى لما نقولك.\nأي ست مصرية أصلية، بعد الجواز مباشرة هتلاقيها بتحط قواعد للبيت كدا وتعليمات لازم تمشي عليها، من أهمها مترميش الشرابات على الأرض، حُط هدومك في الدولاب، متقعدليش عريان في الشقة (هتكون لابس طبعا حاجة بس مش هتبقى مقنعة ليها).. فبننصحك انك تتبع التعليمات دي بحاذفيرها لأنك كدا هتبقى بتساعدها.\nلوكنت هتبهدلها الدنيا، وهتكركبلها المطبخ، وهتكسرلها الأطباق، يبقى ابعد عن المطبخ تماما واقطع علاقتك بيه.. اه دا كدا هتبقى بتساعدها جدًا، ولو عملت العكس هتعتبرك مخرب.\nأيون، لو بتعرف تطبخ ونفسك حلو وبرنس كدا وعندك خبرة عظيمة في الموضوع، ادخل ساعدها، أو خلي يومك عليك في الطبيخ، أو فاجئها مرة إنك اللي هتعمل الغدا أو العشا ليها، هتبقى عملت أكبر مساعدة في الدنيا.\nتبقى برنس أوي في نفسك ومحترم لو قومت بعد ما خلصتوا أكل وشيلت معاها السفرة وساعدتها في كدا. بتبقى حركة جنتله منك وفيها مساواة كدا لأنكوا شركا في البيت.\nأه المواعين يا برنجي.. دي من أكتر الأعمال اللي بتكرها الستات في الدنيا، لو قسمت بينك وبينها الموضوع دا مرة ومرة أو انت خدت مرتين في الأسبوع الموضوع هيبقى لطيف جدًا بشكل مش هتتخيله.\nإنك تاخد معاك كيس الزبالة وأنت طالع من البيت عشان ترميه، هي صعب جدًا تمسكه ومعاها عيال والدنيا لخمة، فشيل مسؤوليتك بقى وخُده معاك.\nإنك متكسلش لو طلبت منك حاجات للبيت، سواء أكل أو أدوات كهربائية أو تصليح حاجة بايظة، أو تكلم بتوع الغاز يجوا يشوف الدنيا لو فيها مشاكل.\nلو كنت فاكر نفسك إن بعد الجواز هتعيش برنس في نفسك مرتاح مع حبيبتك والحياة …\nلن يتم نشر عنوان بريدك الإلكتروني. الحقول الإلزامية مشار إليها بـ *