الطريق لقلب الراجل معدته

لما كتبت على الفيسبوك تفتكروا فعلاً "هل الطريق لقلب الراجل معدته؟"، معظم الستات كتبت لا.. الطريق لقلبه إنها تبقى حنينة، عاقلة، شخصيتها مريحة، الحب هو أقصر طريق للقلب. لكن أنا لو حد سألني بعد كل سنين الجواز وخبرات الصديقات هقول "آه طبعًا".. مريحة إيه وبطيخ إيه وشهادات إيه، أي راجل على كوكب الأرض بيقرب لست بيقربلها عشان حلوة، وبيفضل معاها عشان أكلها حلو.. آسفة عزيزتي المصدومة.\nفيه نكتة بتقول راجل غني كان بيختار ست يتجوزها من أربع ستات، فأعطى كل واحدة مبلغ كبير تصرفه وبعد أسبوع يقرر، فالأولى عملت مشروع تجاري، والتانية عمل خيري، والتالتة اشترت فساتين، والرابعة حوّشتهم.. اتجوز مين يا ترى؟ اللي جسمها أحلى. \nالرجال هم أطفال أطول قامة.. لا يعنيهم في الحياة سوى عملهم، وفي الحب والزواج لا يهتم بشيء أكثر من الجنس والأكل، كل الأشياء الأخرى.. شخصيتها، أفكارها، لبسها، تدينها، أهلها.. كله ثانويات أمام احتياجاته الأساسية، وأي راجل يقولك غير كده وإنه بيهتم بالجوهر ومش مهم شكل الست وأبعاد جسمها، ومش مهم طريقة عملها للمكرونة بالبشاميل وطشتها للملوخية ولفّتها لورق العنب، فهو يا عزيزتي كداب.. كداب وبيتجمل، وفي أقرب وقت هيقولك فلانة أكلها حلو وفلانة شكلها حلو.\nأول ما الست بتتجوز بتتصدم إن الراجل جعان، في السرير وعلى السفرة، في السرير لو بيحبك فهو مش هيقارنك بحد، لكن على السفرة، يسقط الشيف شربيني والشيف أسامة ويسقط طبيخ أمك ويعيش طبيخ حماتك يعيش.\nطول الوقت هيقارن أكلك بأكل أمه، "حبيبتي ماما بتحط ملح أكتر، زودي الملح.. مش عاجبني الباشميل ده، اسألى ماما بتعمل البشاميل إزاي.. الملوخية ماما مبتحطش عليها نص طماطماية.. المحشي ماما بتحط عليه لحمة مفرومة..." وهكذا، وتفضلي مهما حاولتي يبقى ليكي شخصيتك المستقلة، إلا إن شبح حلل حماتك بتطاردك دايمًا.. والحل إنكم تتقابلوا في نص الطريق، لازم ترضيه وتبعدي قصة كرامتك، وتسألي حماتك وتكسبي جوزك، والأصناف الجديدة الخاصة بيكي هتاخد سنين وبعدين تنتصرعلى السفرة، لأن الراجل اللي قعد ياكل من إيد أمه كل سنين عمره صعب في يوم وليلة يغير الطعم بسهولة، لكن تفائلي، لأن الرجالة كائنات نمطية؛ بعد شوية هياخد على أكلك ويحبه.. اصبري.\nعندى نظرية لطالما دافعت عنها، وهي أن عادات الرجل الغذائية تتشابه إلى حد كبير جدًا مع عاداته الجنسية، يعني لما تقعدي تاكلي مع راجل على السفرة هتفهمي من طريقة تعامله مع الأكل طريقة تعامله في الجنس.\nالراجل النضيف المحفلط في أكله وطبقه وبيشم ريحة الأكل، هو أيضًا محفلط في السرير ونضافة الملايات ونعومة جسمك وريحة برفانك.\nالراجل الرياضي المهتم بصحته بياخد باله من الأكل الصحي، ولا يمارس الجنس بكثرة، وبيخاف على ركبه، وأيام الجيم والنوم بدري أهم منك ستين مرة.\nالراجل اللي مبيحبش الأكل.. مبيحبش الجنس، الغريزة عنده في أضعف صورها.\nالراجل الأكول الغير مبالي بآداب الطعام أو نصيب كل واحد على السفرة من الفرخة، هو نفس الشخص الغير مبالي برغباتك في علاقتكم، أناني لآخر الطريق.\nإحدى الطرق المهمة للوصول لقلب رجل معدته طبعًا، اوعي تتجاهلي الغريزة، الراجل اتعوّد يحصُل دائمًا على الطعام، حتى لو مش مهتم بيه، لكنك لو عرفتي إيه اللي ممكن يجذبه في الأكل، شكله، ريحته، الخضار، اللحمة.. ميعاد وجبته المفضلة، أعتقد إنها طريقة إنه يتعوّد عليكي ويحتاجلك، وطريقة لإظهار حبك واهتمامك بيه.. اطبخيله تملكيه.