ليالى قريش.. الليلة 115

اتجوزوا وما بين الجواز وبدايه الدعوه 15 سنه، كالعاده مليانين احداث رواياتها غير مكتمله، وعليها خلافات كتير، فخلينا نبدا، وربنا يعيننا بقي.

اول حاجه الاولاد؛ الروايه الرسميه السنيه المعتمده بتقول ان النبي محمد وخديجه بنت خويلد خلفوا ست ابناء ولدين واربع بنات.

الولدين القاسم وعبد الله "علشان كده النبي كان يكني ابو القاسم"، والبنات زينب ورقيه وام كلثوم وفاطمه، الولدين توفوا في سن الرضاعه، والبنات الاربعه عاشوا.

فيه اصوات بتقول كلام مخالف لده، لكننا مش هنتعرض للاقوال دي نتيجه حساسيتها من ناحيه، وعدم وجود مصادر واضحه بالنسبه لنا من ناحيه تانيه، كلها استنتاجات وتركيب امور جنب بعضها، فخلينا نعتمد الروايه الرسميه.

زينب البنت الكبيره اتجوزت قبل الدعوه، اتجوزت ابن خالتها، لو تفتكروا ان خديجه كان ليها اخت اسمها هاله بنت خويلد، وهي اللي تدخلت في موضوع الجواز، هاله دي كانت متجوزه واحد اسمه الربيع، من العيله برضه، واسمه بالكامل الربيع بن عبد العزي بن عبد شمس بن عبد مناف بن قصي بن كلاب.

هاله والربيع كان ليهم اكتر من ولد منهم ابو العاص بن الربيع، وابو العاص ده هو اللي اتجوز زينب بنت النبي، ويوم الجواز خديجه اهدتها سلسله دهب، السلسله دي افتكرها معايا، لان ليها عوزه فـ الاحداث بعدين.

رقيه وام كلثوم اتجوزوا ولاد ابو لهب عم النبي، اسمهم عتبه بن ابي لهب وعتيبه بن ابي لهب، وبرضه الجواز كان قبل الدعوه للاسلام.

لاحظ هنا ان رقيه حسب الروايات "في مستدرك الحاكم مثلا" اتولدت والنبي كان عنده 33 سنه، يعني خديجه كان عندها 48 سنه، ومعني كده ان رقيه كان عندها سبع سنين وقت بدايه الدعوه، ولاحظ كمان ان رقيه اكبر من ام كلثوم، يعني ولاد ابو لهب اتجوزوا بنات النبي والبنات عندها اقل من سبع سنين.

ابن حجر العسقلاني قال انهم ما دخلوش بالبنات، هم بس عقدوا القران، يعني كتبوا الكتاب، انما الدخول كان هيحصل بمجرد ما "يطيقوا الوطء" يعني بمجرد ما يبقوا قادرين علي القيام بالمهام الزوجيه من الناحيه الجسديه، مش هنفسر اكتر من كده.

علشان كده الواحد بيستغرب لما الناس تنشغل بسن عائشة بنت ابي بكر لما النبي اتجوزها، ويقولوا تسع سنين ولا سته ولا 18، ايشمعني عائشه، ما هي البنات كلها اهي كانت بتتجوز كده، وحتي لو افترضنا انه بس "كتب كتاب" لحد ما يطيقوا الوطء، ما زينب كانت دخلت علي ابو العاص بن الربيع، وزينب في افضل الاحوال كان عندها 12 سنه وقت بدايه الدعوه.

ييجي واحد يقول لك: ما هو ده يؤيد فكره ان البنات دول مش بنات النبي، دول بنات خديجه من زيجات سابقه، والنبي رباهم علي انهم بناته، فبالتالي هم ما كانوش صغيرين وقت الجواز، ده اقول له: ارجع كام سطر، احنا معتمدين الروايه الرسميه، كلامك مالوش مصادر.

انما تفضل ملاحظه مهمه بعيده عن سن البنات، ان ابو لهب جوز اتنين من ولاده لاتنين من بنات النبي، وده يقول لك ان العلاقه بين النبي وعمه كانت علاقه جيده قبل الدعوه، وفضلت كده من ساعه الولاده، ساعه ما ابو لهب اعتق ثويبه اللي بشرته بميلاد ابن اخوه، لحد اللحظه اللي حصل فيها الخلاف مع بدايه الدعوه.

ملاحظه تانيه خاصه بالسن برضه، بس سن خديجه اللي فضلت تخلف لحد ما عدت الخمسين، لان ام كلثوم ما كانتش اخر البنات، فيه بعدها فاطمه الزهراء.