ما لا تعرفه عن السوشي (1)

السوشي بالنسبه للي مايعرفهوش لغز كبير، واساطير وقصص بيسمعوها عنه، وكم افتراءات رهيب وفتي طبعاً. وكتير مش عارفين وبيربطوه بالاكلات الصيني التجاريه اللي بياكلوها في المولات وغيرها. وكتير مايعرفوش انه سمك بس، مفيش فراخ او لحمه.\nفي هاله حوالين السوشي واسلاك شائكه وسمعه اما وحشه جداً، يا سمعه طيبه جداً من قبل عشاقه ،مع انه مجرد اكله مختلفه شويه عن اللي اتعودنا عليه.\nالسوشي مالوش طقوس اكل معينه. السوشي فن متاح للجميع، ياكله زي ما يحب، المهم يتبسط بالوانه وطعومه وافكاره وتنوعه وتميزه عن باقي الاكلات.\nمفيش عقد، مابتعرفش تستخدم الشوب ستيكس وخايف تروح تجرب\nعندك حلين: الاول فيه عصايتين مشبوكين في بعض سهل تتعود عليهم في الاكل لما تجرب ومش عيب تكون اول مره.\nالطريقه التانيه: واللي معظم اليابانيين بيتبعوها انهم بياكلوه بايديهم! ايون! والنعمه بايديهم من غير اڤوره وتكلف! بلدك بس هما اللي محبكينها وبيعتبروها حاجه عيب. مع انها ايدك انت، مش ايد حد تاني، وضامن انها نضيفه.\nواصلا السوشي عباره عن قطمات صغيره، يعني مش هتتعب وانت بتاكل بايدك، ولا هتلحوس نفسك، بالعكس.\nنتعرف الاول علي السوشي 寿司\nالسوشي اكله صينيه في الاصل، واخدوها في اليابان وبقت اكلتهم الشعبيه. وفيه صراع حوالين المعلومه دي. بس ده اللي وصلتله بعد بحث كتير،\nومحدش فيهم قادر يثبت احقيته في الاختراع بالتواريخ.\nالمكون الاساسي في اكله السوشي هو الرز (الشاري بالياباني)،\nوطبعاًً السمك، بمختلف انواعه واشكاله، اذا كان ني او مستوي او مدخن.\nو اعشاب البحر او الsea weed او (النوري ).\nمع اختلاف طبعاً طرق امتزاج المكونات دي مع التوابل والصوصات.\nللسوشي انواع كتير، اشهرهم واللي موجودين في مصر:\nوهو الطريقه التقليديه للسوشي. ومعناها انه بيتعمل بالايدين.\nعباره عن كومه من الرز مستطيله ،مع رشه وسابي (فجل ياباني مطحون)،\nبيتحط فوقيها قطعه سمك مستطيله من اي نوع، وبتتلف باعشاب بحريه لونها اسود رفيعه.\nوبتتقدم مع صويا صوص او تيرياكي صوص( حسب الرغبه).\nعباره عن شرائح سميكه من كل انواع السمك الني، بيقدموا كدا زي ما هي، بدون اي اضافات او سوا.\nيعني اللفافه. عباره عن اعشاب بحريه، ملفوف جواها المكونات علي شكل اسطواني، وتقطع ل ٤او ٦او ٨ قطع صغيره، بتبين لنا الحشو ايه من جواها. وعادهًً بتتحشي افوكادو وخيار ونوع سمك. وممكن اضافه مايونيز او جبنه فيلادلفيا او غيرها من الحشوات، او ممكن سمك فقط وده الستاندرد.\nمنه مشتقات كتيره لكل واحد اسم وطريقه : فوتوماكي (لفائف كبيره)، هوسوماكي (لفائف رقيقه)، اوروماكي (لفائف بالمقلوب، الرز بالخارج والنوري بالداخل ويضاف السمسم او حبه البركه )، تيماكي (لفائف يدويه تشبه القرطاس محشيه رز ونوع سمك او جمبري وخس صيني للتزيين )، انراي سوشي (سوشي محشو).\nاوشي سوشي (يعني السوشي المضغوط). بيتعمل في قوالب خشبيه، بتتعبي القوالب الصغيره بالمواد بالترتيب، بوضع التغطيه بالاسفل لتغطيه رز السوشي بالمقلوب، ويضغط القالب، ثم يُقلب ويُفتح ويُقطّع بحجم لقمه.\nاما بقا الحاجات اللي بتتقدم جنب السوشي: ناخد جوله ومعلومات عنهم :\nنبات من الفصيله اللي ، زي الكرنب، والفجل والخردل. يعرف الواسابي باسم “الفجل الياباني”، وبيتعمل بجذوره البهارات، لانه له نكهه قويه جداً .تقترب حده طعمه الي الخردل الحار واكتر من الفلفل الحار، فهو ينتج ابخره تحفز الممرات الانفيه اكثر من اللسان.\nاسلوب طهي في المطبخ الياباني، وصوص\nبيتكون من صويا صوص وميرين ( ساكي او نبيت الرز ) وسكر، بس في الدول العربيه بيتعمل بالسكر والصويا بس، وبيتشوي او بيتقلي او بيتسلق فيه اللحوم او السمك، او بيتقدم كصوص يتغمس فيه السوشي.\nيعتبر صوص الصويا من اهم التوابل الاساسيه في المطابخ الشرق اسيويه، وتعود نشاته الي الصين الي حوالي قبل 2800 عام.\nبيتحضر الشويو من القمح والفول الصويا والملح وكل اللي بيتباع في السوق ده بيتخمر صناعياًً. وبيساعد علي هضم الحبوب والخضار وله فوائد كتير جداً.\nوبيتحط علي الاكل في نهايه عمليه الطبخ، مش من الاول، وبيتحط في شوربات وسلاطات كتير بيكون هو اساسها. وبيتقدم مع السوشي، بيتغمس فيه السمك.\nبيتخلل او بيتبل مع خل رز وسكر، بيبقي طعمه مسكر وباين فيه طعم الزنجبيل الزاعق،\nويفضل استعمال صغار الجنزبيل الفريش لصنع الgari الناجح.\nوبيتاكل بين كل نوع ونوع من السوشي، وبيعمل عمليه مسح للطعم القديم، ويخليك تقدر تستطعم الطعم الجديد، كانك ما اكلتش حاجه قبله. وطعمه حلو جداً. وبيسيب افتر تيست جميل في حلق بقك وزورك.\nكده انت جاهز تقابل اطباق السوشي، وانت عندك المعلومات الكافيه جداً.\nفي الجزء الجاي هاشرح لو اول مره تجرب ايه، وتاكل ايه بالترتيب، وتاكلهم ازاي.\nوفي الجزء التالت هانشوف هناكله فين، بالاسعار والتفاصيل واحسن العروض