المحتوى الرئيسى

في ريدبل سر الكينج.. منير يكشف مواصفات فتاة أحلامه

كشف الكينج محمد منير عن مواصفات فتاة أحلامه قائلا: "لو أطول النجم أجيبه وأهديهولك يا أميرة طول عمري هاغنيلها كده ، بس أنا محتاج لها أكتر زوجة ترعاني"، وتابع: "أحبها تحب أصحابي اللي أنا حبتهم في حياتي و تحب أكلي اللي أنا اتعلمته في بيت أمي وأبويا، أحبها أنيقة وشيك، تكون مثقفة ، تجيد لغة وأحبها تتعامل معايا ومع أصحابي الأجانب"

وأضاف الكينج في الحلقة الرابعة ضمن فعاليات ريدبل سر الكينج، مع الإعلامي عمر طاهر، إنه يريدها تحب استقبال الضيوف لأنه بطبعه مضياف: "أنا من البيوت اللي كانت مفتوحة لأن أنا اتربيت في بيت كدة أبويا وأمي كان بيتهم في أسوان قبل بناء السد العالي كانت الباخرة بتيجي يوم الخميس والاثنين من القاهرة  ألاقي بيتنا ده في 80 واحد ماعرفهمش"

متابعا: " أحب بيتي يكون فيه 20 ألف بطانية و20 ألف مخدة، اتعلمت ده .. التكوين ده هو اللي علمني ، وطبعا البيت المفتوح ده عايز ست جدعة، والملخص إنها تحبني وأنا أحبها واحترمها وأقدرها وأشيلها فوق راسي"

وعن الأكلات المفضلة للكينج قال إنه يحب أكل البيت بالإضافة للأكلات الأجنبية المميزة قائلا: "أنا باحب الأكل اللي اتربيت عليه في بيت أمي، وأنا راجل خواجة، باروح مطاعم في أمريكا وفي أسبانيا وفي انجلترا وفي فرنسا وفي ألمانيا وفي كل البلاد"

كما تحدث الكينج عن تجربة التمثيل قائلا: "أنا كنت محظوظ شوية في التمثيل لأن اللي قابلتهم كانوا يوسف شاهين وخيري بشارة وجتني فرصة إن أنا أمثل مع سيدة الشاشة العربية فاتن حمامة فأنا راجعت نفسي فترة قلت طب مين مثّل مع فاتن حمامة اكتشفت إنه محمد عبد الوهاب وفريد الأطرش وعبد الحليم حافظ يا سلام لو بقى محمد منير "

قدم منير نصيحة للمطربين الجدد لكي يتميزوا في الزحمة: "كون نفسك بس"، كما علق الكينج على مقطع فيديو له يغني شبابيك سنة 1984 قائلا: "دي فرقة من أجمل الفرق اللي جت في تاريخ مصر، صوت رائع ولائق للغنا ينجح بالرعاية وممكن يكون في المصاف الأولى للغنا في مصر"، ونصح نفسه بالسفر لأوروبا في ذلك الوقت: "يمكن كنت خدمت مصر أكتر من كده بكتير، وكل أصدقائي المغنيين العرب الأساسيين اللي نجحوا في أوروبا زي شاب خالد .. شاب مامي  .. أمينا .. كادر كل دول كانوا زملاء عمل واشتغلنا كتير مع بعض كنت هاكون واحد منهم أو ربما أقل منهم أو ربما أكبر منهم"

وتابع في نفس السياق:"أنا ابتديت في ألمانيا بألف متفرج في مراكز ثقافية صغيرة بعد كدة تطورت بقيت أغني  لـ ١٥ ألف، بعد كدة اتطورت..أغني لـ ٣٠ ألف .. النهاردة وصل الرقم بتاعي إلى ٥٠ ألف مواطن أوروبي، وأنا فخور بده وباهدي فخري ده لمصر"

واختتم لقائه مع ريدبل سر الكينج باكيا: "لو عندي فرصة استدعي حد يقضي معايا 24 ساعة هيكون فاروق أخويا .. اللي علمني أ ب الغنا الله يرحمه أكيد كان هيفيدني كتير ، إني أواصل مشواري الغنائي ، ووحشني محمود ابن عمي لأن هو كان العمود الفقري كمان في غنايا كان يدير لي عملي بإخلاص" 

 

نجح 100 شخص في حل لغز سر الكينج ويحضرون الحفلة الخاصة مع ريدبل يوم 6 مارس.

 

Comments

عاجل