#إزاي_توفري | أفكار بسيطة للتوفير في الاحتياجات اليومية

منذ 7 سنوات

بعد غلاء الأسعار حاولنا معاكي نشوف شوية أفكار للتوفير عشان الميزانية ما تبوظش مننا في آخر الشهر.. جربيها

#إزاي_توفري | أفكار بسيطة للتوفير في الاحتياجات اليومية

عودي أطفالك على سناكس زي الفشار والترمس لأن شوية صغيرين منهم لما بتتعمل بتدي كمية كبيرة جدا أوفر من الشيبسي والسناكس اللي بيشتروها وصحية أكتر لهم طبعا

اقلي كل حاجة زي البانيه والكفتة والبطاطس في الفرن بمعلقة زيت واحدة ترصي الحاجة في الصينية وترشي عليها زيت بالبخاخة هتوفري جدا في استهلاك الزيت وصحية أكتر

اشتري الخضار في الموسم بتاعه لأنه بيكون أرخص كتير وقسميه على أكياس واحفظيه في الفريزر هيوفرلك كتير من أكياس الخضار الجاهزة اللي بتشتريها

لو عندك عيش فينو ناشف ما ترميهوش حمصيه في الفرن واطحنيه هيبقى بقسماط ناعم تستخدميه في البانيه بدل ما تشتري

لو سلقتي فراخ وعندك شوربة متبقية ما ترميهاش حطيها في أكياس نضيفة وشيليها في الفريزر وممكن تعملي بيها أكلة محتاجة شوربة زي المحشي والملوخية في يوم مفيهوش فراخ

حطي معلقة كبيرة ملح مع الصابون السايل للمواعين هيتقله جدا وبكده تقدري تخففيه بمياه وتستعملي كمية أقل

بدل المطهرات الغالية لمسح الأرضيات تقدري تحطي على مياه المسح شوية ملح ونقطتين من أي زيت عطري عندك

بعد غلاء الأسعار حاولنا معاكي نشوف شوية أفكار للتوفير عشان الميزانية ما تبوظش مننا في آخر الشهر.. جربيها