حواديت أطفال جديدة هادفة مكتوبة بالعربي لإسعاد طفلك قبل النوم

حواديت أطفال

إن من الأمور التي نتوارثها عبر الأجيال، فتجد أن القصة التي رويت لك وأنت طفل تروى الآن بشكل مختلف لطفلك بما يناسب عصره، ومن المعروف أن الطفل الذي تروى له القصص، والحواديت، والحكايات، يستطيع أن يعبر عن نفسه بسهولة، ويكتشف ما يحب وما يكره في سن مبكرة، ومن هنا نقدم لكم قبل النوم بالعربي.. فتابعونا!

حواديت أطفال جديدة هادفة

  • في البداية أخبر طفلك باسم الحدوتة.

    “هنحكي حكاية جميلة النهاردة اسمها السلحفاة الصغيرة”.

  • ثم ابدأ في تمهيد القصة له.

    “كان يا ما كان في سالف العصر والآوان جزيرة هادئة خالص، مفيهاش أي دوشة، وعايش فيها سلاحف كتير وصغيرين”

  • عرّف الطفل على بطل أو بطلة الحدوتة.

    “كان وسطهم سلحفاة صغيرة خالص، اسمها سوسو، كانت
    كل يوم تخرج في الجزيرة، وتتمشى على البحر شوية، وبين الشجر شوية”

  • عرّف الطفل على شخصيات الحدوتة أو الخصم.

    “وفي يوم قابلت سوسو أرنب أبيض جميل، بس كان سريع جدًا،
    زعلت سوسو وقالت لنفسها يارتني حرة زي الأرنب الجميل ده، أجري،
    وألعب، وأنط، بس بيتي اللي شيلاه على ظهري ده تقيل أوي..
    يارتني أخلص منه، وانط زي الأرنب”

تذكر.. تشير العديد من الدراسات إلى أن الطفل منذ الأشهر الأولى يمكن أن نروي له القصص المزودة بالصور والألوان، التي تناسب عمره، حيث تجعله يكتشف أمور جديدة في الحياة، بعد أن اكتشف أن هناك أم وأب وبعض الأقارب المتمثلين في الخالات أو الأجداد.

قصص للاطفال بالعربي

  • الآن: حاول أن تعلم طفلك أن الطبيعي أن نعبر عن مخاوفنا وآلامنا للأم أو الأب.

    “روحت سوسو عند مامتها، وقعدت تعيط وتقولها يا ماما أن مش عايزة
    البيت الحجر اللي فوق جسمي ده، أنا عوزه أكون زي الأرنب، عشان
    ألعب وأنط من غير ما أحس إني تقيلة”

  • حاول أن تعطي لطفلك درس أخلاقي من القصة بشكل غير مباشر.

    “مامة سوسو قالتلها إنتي غلطانة يا سوسو، ده شكلنا اللي ربنا ميزنا بيه،
    كل واحد في الدنيا ديه له شكله اللي يناسبه، واللي لازم يحبه، ومش المفروض تتكسفي من شكلك أو تكرهيه، ما يمكن الأرنب نفسه في بيت حجر زيك،
    ومعندهوش اللي يحميه من المطر والحشرات؟”

  • الآن: أخبر طفلك أن البطل وجد حلاً لمشكلته بنفسه.

    “سوسو ما اقتنعتش بكلام مامتها، وقررت تروح الغابة، وتمشي بين الشجر،
    وراحت وقفت بين شجرتين لحد ما اتزنقت، وبدأت تزق في جسمها عشان
    الحجر اللي فوقيها يتشال، وفعلاً الحجر اتشال، بس سوسو اتعورت جامد،
    وقعدت تنط زي الأرنب بس من شدة الألم لحد ما وقعت على الأرض،
    والحشرات جت على جسمها المتعور”

حواديت أطفال

لا تنسى.. عادة ما تبدأ الحدوتة ببعض الجمل، مثل: كان ياما كان، ويحكى أن، والصيغة الأشهر هي: كان ياما كان ما يحلى الكلام إلا بذكر النبي عليه الصلاة والسلام.

قصص قبل النوم لإسعاد طفلك

  • علم طفلك أن الاعتراف بالحق فضيلة.

    “سوسو قعدت تعيط وتصرخ، وتقول يا ماما إلحقيني، يا بابا تعلالي، أنا غلطت إني ما سمعتش الكلام، إنقذوني وأنا هسمع الكلام”.

  • أخبر طفلك أن الأم والأب هم الملاذ الوحيد لأطفالهم ومصدر أمانهم.

    “سمعت مامة سوسو وباباها صوت سوسو، وجريوا عليها، وهم بيعيطوا وخايفين جدًا على سوسو، قالتلهم سوسو أنا آسفة أنا غلطت، بس جسمي بيوجعني أوي، ماتزعليش مني يا ماما، مامة سوسو قالتلها أنا مسمحاكي؛ لأنك عرفتي إنك غلطتي، وماخفتيش تقولي ده، ودلوقتي هنروح للدكتور يمكن يقدر يساعدنا”

  • الآن اختم الحدوتة، واسأل طفلك عن رأيه فيها.

    “وفعلاً مشيت سوسو مع بابا وماما وراحوا للدكتور، وهم حاضنين سوسو، والدكتور ربط سوسو بششاش وقطن كتير جدًا، عشان تخف، وقالت سوسو أنا عمري ما هبص تاني للأرنب أو لأي حد، أنا باحب نفسي زي ما أنا.. وتوتة توتة فرغت الحدوتة حلوة ولا ملتوتة؟”

حواديت أطفال

مهم جدًا.. أن يقضي الوالدان وقتًا مع أطفالهم بشكل دائم ومستمر، دون أن يتعلقوا بهم بشكل مرضي، ومن المفيد أن يحكي الأب أو الأم حدوته قبل النوم لأطفالهم؛ حتى يستيع الطفل أن يعبر عن نفسه بسهولة أمام الناس.

قد يعجبك: قصص الأطفال الشهيرة

اقرأ أيضا  قصص الأطفال الشهيرة قبل الخلود إلى النوم
قصص للاطفال مكتوبة تجلب النوم

كان يا ما كان ما يحلى الكلام إلا بذكر النبي عليه الصلاة والسلام، حكايتنا النهاردة حكاية “الأسد والفأر”، كان فيه مرة أسد، وإللي معروف عنه إنه ملك الغابة، الأسد كان نايم وفجأة صحي مفزوع من نومه بعد ما جري فأر على ظهره، وفجأة قرر الأسد إنه يعاقب الفأر بإنه يأكله فورًا، خاف الفار، وحاول الفار إنه يقنع الأسد، قاله: “لو سبتني النهاردة أنا ممكن في يوم من الأيام أساعدك بس سيبني”.

الأسد ضحك وسخر من الفأر، وقاله “إزاي فار صغير زيك، ضعيف جدًا، يساعد ملك الغابة القوي اللي زيي؟ عموما أنا سامحتك وهسيبك”، وفعلاً جري الفار وهو بيشكر الأسد، “شكرًا يا ملك الغابة وصدقني مش هتندم إنك سبتني أمشي”.

اقرأ أيضا  قصص قبل النوم للأطفال من أجل نوم سريع وهادئ

للمزيد من حواديت أطفال طالع: قصص قبل النوم للأطفال مشوقة ومسلية

قصص وحواديت وحكايات

مر كام يوم، والأسد وهو بيتمشى في الغابة فجأة وقع في شبكة الصيادين، في الوقت اللي كان الفار خارج عشان يجيب فطاره، فلقى الأسد، وقرر إنه يردله الجميل ويساعده، فقرب على الشبكة وفضل يقرقض فيها بأسنانه لحد ما فكت، وهرب الأسد ومعاه الفأر، وقاله الفار: “صدقتني يا ملك الغابة إن رغم جسمي الصغير إلا إني أقدر أساعدك؟” فقاله الأسد: “أنا آسف إني ما صدقتكش وعيبت عليك، أنا من غيرك كان زماني ميت أو محبوس”.

ومن هنا شكر الأسد صديقه الفار، وقاله: “إنت من النهاردة صديقي الوفي، اللي مش هستغنى عنه، لأنك ساعدتني وما خفتش إنت كمان تقع في شباك الصيادين، أو حد منهم يشوفك ويقتلك”، وقاله الفار: “إنه واجب عليه لما يشوف أي حد من حيوانات الغابة في مأزق إنه يساعده، ومايسبهوش، وإنه لازم يعمل ده بدون ما يدور على مقابل”. ومن هنا خلصت حكاية الأسد والفأر، وتوتة توتة خلصت الحدوتة، حلوة ولا ملتوتة؟

إن الحواديت تساعد طفلك على اكتشاف حلول بديلة ومختلفة وسريعة لأي مشكلة يقع فيها، ومن ثم لا ينتظر حلولاً من الأب أو الأم، ومن هنا يبدأ الطفل في اعتماده على نفسه من سن صغيرة.

حكايات اطفال مصورة للقراءة

إن كنت تعرف أن طفلك يفضل الحواديت المصورة، شاهد معه الفيديو التالي، وقص عليه حدوتة ليلى والذئب، والمعروفة باسم “ذات الرداء الأحمر” فقط شاهد الفيديو التالي:

عادة ما تنتهي الحدوتة ببعض الصيغ المحفوظة، مثل: توتة توتة خلصت الحدوتة، حلوة ولا ملتوتة، ومن المعروف إن الطفل إن قال “حلوة” يرد من يروي له القصة “عليك غنوة” أي أن الطفل عليه أن يغني، أما وإن لم تعجب الطفل وقال “ملتوتة” يقول له الراوي “عليك الحدوتة”، ومن هنا يبدأ الطفل في قص حدوتة وعلى الراوي أن يسمعه.

إلى هنا نكون قد تعرفنا إلى حواديت أطفال بالعربي، يمكنك أن تقصها إلى طفلك قبل أن يخلد إلى النوم، أو في أي وقت كان، والآن: هل تتذكر آخر حدوتة أخبرتها لطفلك؟ (شاركنا)

مواضيع قد تعجبك