المحتوى الرئيسى

الرئيس.. وشعب مصر

10/15 21:04

- "شعب مصر؟... أيوه مين معايا؟"

ـ أيوه شعب مصر معاك، مين اللي بيتكلم؟

ـ يا ريس بنحبك.. يا ريس بنحبك.

ـ أنا بكلم الـ١٠٠ مليون بكلمكم إنتوا يا مصريين.

ـ أيوه يا ريس إحنا الأغلبية -معلهش خليك معايا الشبكة بتقطّع-، وإحنا داخلين على أسانسير. ممكن تكلمنا بعد الضهر، أو بص يا ريس خليها بعد المغرب، أصل إحنا طابخين قلقاس، والدماغ بتبقي مأكسدة شوية، بس والله ح تنورنا يا ريس.

ـ يا مصريين، أنا عايزكم إيد واحدة، جيش وشعب ومؤسسات، عايزكم مع بعض كده.

ـ والله يا ريس إحنا كلنا كده، حضرتك ما تعتلش هم، كلنا إيد واحدة بالصلاة ع النبي، ده الجيش ده فاتح بيوت ملهاش عدد، ربنا يخلي لنا الجيش، اللحمة والتموين والخضار اللي بينزلها كل يوم برخص التراب بنلمها ونبيعها للبقالين والسوبر ماركت ونسترزق بقرشين حلوين، الحكومة بتمد الكهربا في كل حتة وإحنا بنسرق تيار ينور لنا أكشاك ومحلات وبيوت ياما، طب والله إحنا في نعمة.

ـ أنا بخاطب شعب مصر اللي أنا عارفه.

ـ معلهش بقى يا ريس متأخذنيش في الكلمة، حضرتك متعرفناش كويس، حضرتك تبني مدن تعمل طرق، مشروعات، مدن صناعية، تصدر غاز، ده حلو وعال العال بس إحنا بقى دكاترة مهندسين نجارين سباكين بياعين بطيخ حتى، أغلبيتنا كده والحمد لله ضرايب ما بندفعش ومش ح ندفع، رشاوي ح نقبض، مُخالف ح نبني، أرض زراعية ح نبور.

خطاب ديني مش ح نصلح، وربنا فوق وابن تيمية تحت وكله بالسنّة وقال البخاري وقال الرسول، سلو بلدنا كده، شعب كده عامل زي الست النكدية اللي بتتلكك عشان تتطلّق.

شعب عسل، والله يا ريس ما ح تلاقي شعب زينا.

ـ أنا بلف العالم كله عشان أجيب استثمارات وأزود فرص العمل.

ـ ما هو ده اللي إحنا بنقوله يا ريس، تلف العالم تروح الهند تروح اليابان ما لناش فيه.

استثمارات إيه دي يا ريس اللي مع اليابان اللي ح تشغل بالنا؟ إحنا عايزين سوشي العيال تاكل وتنبسط، وحكاية فرص العمل دي اللي حضرتك تاعب قلبك عليها، هو إحنا اشتكينا من فرص العمل؟ ما العمل على قفا مين يشيل بس للي باله رايق، ده الواحد بيرجع م القهوة ٣ الصبح مش شايف قدامه، عمل إيه وأجور إيه يا ريس؟!، إحنا عايزين مصروف... وكل سنة وأنت طيب.

ـ لازم تعرفوا إننا بنخوض حرب. افهموا يا مصريين.

ـ وإحنا مش ساكتين يا ريس، بندعي لك، والخاتمة الشريفة بندعي لك وإن شاء الله ترجع منصور وربك للغلابة جابر.

ـ أنا كل مرة بشرح لكم إحنا في إيه وبنواجه إيه وبنبني إيه؟!

ـ والله عارفين وطلتك علينا دي بالدنيا وكلامك زي البلسم، النبي ما تغيب علينا

ـ طبعاً يا ريس ربك فوق الكل وهو المعين. بس والله إحنا شعب عسل وبنحبك يا سيسي.

بنحبك... ألو ... يا ريس.

ـ يا ريس. إنت قفلت السكة؟! طب بنحبك يا سيسي، بنحبك.

من مسؤول كبير قوي لمسؤول مش كبير قوي:

ـ إنت إزاي مطبقتش قرار الرئيس بزيادة الحد الأدنى، قاصد تحرجني؟

ـ يا باشا والمصحف طبقته بمنتهي الحرص ومن أول يوم.

أهم أخبار مقالات

Comments

عاجل